Qaraǵandyda esirtki taratýmen aınalysqan 19 jastaǵy turǵyn ustaldy
QARAǴANDY. KAZINFORM – Qaraǵandyda esirtkini jasyryn qoıyp ketýshi qylmys ústinde qolǵa tústi.
Polisia.kz-tiń málimetinshe, Qaraǵandy oblysy polıtsııa departamentiniń esirtki qylmysyna qarsy is-qımyl basqarmasynyń qyzmetkerleri júrgizgen jedel-izdestirý is-sharalarynyń nátıjesinde esirtki zattaryn zańsyz taratty degen kúdikpen aýyldyq eldi meken turǵynyn ustaǵan. Quqyq qorǵaý organdarynyń ókilderi jedel aqparat negizinde atalǵan operatsııany júzege asyrǵan.
Jas jigit esirtki zattaryn jasyryp jatqan sátinde qylmys ústinde qolǵa tústi. Jeke tintý barysynda odan esirtki zaty bar eki orama tárkilendi. Tergeý barysynda kúdiktiniń qala aýmaǵynyń ártúrli bólikterinde osyndaı 18 oramany jasyrǵany anyqtaldy. Ustalǵan azamattyń telefonynan tabylǵan kýratormen jazysqan hat-habarlardaǵy málimetterdiń kómegimen polıtsııa qyzmetkerleri jasyrylǵan oryndardan taǵy 13 oramany taýyp, tárkiledi.
Saraptama qorytyndysyna sáıkes, tárkilengen zat efedron ekeni belgili boldy. Qazirgi ýaqytta atalǵan derek boıynsha sotqa deıingi tergep-tekserý amaldary júrgizilip jatyr.
Kúdikti tergeý is-sharalary aıaqtalǵanǵa deıin qamaýǵa alyndy.
Buǵan deıin habarlaǵanymyzdaı, Jambyl oblysynda shekaradan 30 keli esirtki alyp ótpek bolǵan sheteldik ustaldy.