Qaraǵandyda er adam balalar alańynda jasóspirimge kúsh qoldandy
QARAǴANDY. KAZINFORM — Áleýmettik jelilerde Qaraǵandyda eresek adam men kámeletke tolmaǵan balanyń qatysýymen bolǵan oqıǵanyń vıdeosy tarady. Polıtsııa barlyq qatysýshyny anyqtap, tekserý jumystaryn bastady.
Qaraǵandyda balalar alańynda bolǵan oqıǵaǵa baılanysty daý órship keledi — áleýmettik jelilerde 12 sáýir kúni Trýdovaıa kóshesinde túsirilgen vıdeo keńinen tarady.
Kýágerlerdiń aıtýynsha, oqıǵa balalar arasyndaǵy qarapaıym janjaldan bastalǵan. Alaıda jaǵdaı qatysýshylardyń biri ata-anasyna habarlasqannan keıin kúrt ýshyqqan. Oqıǵa ornyna kelgen er adam daýdy sheshýdiń ornyna bóten balaǵa kúsh qoldanǵan.
Vıdeodan kóringendeı, er adam aldymen kámeletke tolmaǵan balany moınynan ustap, qylǵyndyryp, silkilegen. Sonyń saldarynan bala jerge qulap, tynysy tarylǵan. Bul beıne qoǵamda úlken rezonans týǵyzyp, áleýmettik jeli qoldanýshylarynyń narazylyǵyn kúsheıtti.
Qaraǵandy oblysy Polıtsııa departamenti oqıǵaǵa qatysy bar tulǵalardyń barlyǵy anyqtalǵanyn habarlady.
— Áleýmettik jelilerge júrgizilgen monıtorıng barysynda Qaraǵandy qalasyndaǵy turǵyn úılerdiń biriniń aýlasynda kámeletke tolmaǵan bala men eresek er adam arasyndaǵy janjal túsirilgen vıdeo anyqtaldy. Atalǵan fakti boıynsha polıtsııaǵa eshqandaı aryz-shaǵym túspegen. Soǵan qaramastan polıtsııa qyzmetkerleri jedel túrde oqıǵaǵa qatysqan barlyq tulǵany anyqtady. Olar bolǵan jaǵdaıdyń mán-jaıyn anyqtaý úshin polıtsııa bólimine jetkizildi. Qazir janjaldyń týyndaýyna sebep bolǵan mán-jaılardy anyqtaýǵa baǵyttalǵan jan-jaqty tekserý júrgizilip jatyr. Tergeý nátıjeleri boıynsha árbir qatysýshynyń áreketine qoldanystaǵy zańnamaǵa sáıkes quqyqtyq baǵa beriledi, — dep habarlady Qaraǵandy oblysy PD baspasóz qyzmeti.
Polıtsııa departamenti kez kelgen janjal tek quqyqtyq alańda sheshilýi tıis ekenin atap ótedi. Sebepteri men jaǵdaılaryna qaramastan, zańǵa qaıshy áreketterge jol berýge bolmaıdy. Sonymen qatar quqyq qorǵaý organdary tekserý qorytyndysy boıynsha protsessýaldyq sheshim qabyldanatynyn atap ótti.
Eske salaıyq, 2026 jylǵy 13 naýryz kúni tústen keıin Atyraý qalasyndaǵy mektepterdiń birinde toǵyzynshy synyp oqýshysy segizinshi synyp oqýshysyn ótkir zatpen jaraqattaǵan bolatyn.