Qaraǵandyda eki jigit sýǵa batyp ketti
QARAǴANDY. KAZINFORM — Qaraǵandydaǵy Fedorov sý qoımasynda qaıǵyly oqıǵa boldy: sýǵa túsýge tyıym salynǵan jerde shomylǵan 2004 jáne 2005 jylǵy eki jas jigit sýǵa batyp ketti. Oqıǵa ornyna qutqarýshylar jiberildi.
Іzdestirý-qutqarý jumystary barysynda súńgýirler qaza bolǵandardyń denelerin jaǵalaýdan shamamen 15 metr qashyqtyqta, bes metr tereńdikten tapty.
Qutqarý qyzmetiniń málimetinshe, sý qoımasynyń bul bóligi shomylýǵa arnalmaǵan. Mundaǵy sý túbi kúrdeli bederge ıe, tereńdigi kúrt ózgerip otyrady. TJD mamandary atap ótkendeı, bul tipti jaqsy júzetin adamdar úshin de úlken qaýip tóndiredi.
— Búgin Fedorov sý qoımasynda eki jas adamnyń ómirin qıǵan qaıǵyly jaǵdaı boldy. Qaza bolǵandardyń deneleri qutqarýshy-súńgýirlermen shamamen bes metr tereńdikten tabyldy. Qaraǵandy oblysynyń Tótenshe jaǵdaılar departamenti óńir turǵyndary men qonaqtaryn sýdaǵy qaýipsizdik erejelerin qatań saqtaýǵa jáne shomylýǵa tyıym salynǵan oryndarǵa barmaýǵa shaqyrady. Mundaı talaptardy buzý orny tolmas qaıǵyly saldarǵa ákelýi múmkin, — dep habarlady Qaraǵandy oblystyq TJD baspasóz qyzmeti.
Qutqarýshylar sý aıdynynyń qanshalyqty qaýipti ekenin syrtqy kórinisine qarap anyqtaý múmkin emes ekenin eske salady. Eger jaǵalaýda shomylýǵa tyıym salatyn belgi ornatylǵan bolsa, ómirińizdi qaýip-qaterge tikpeý kerek.
Sondaı-aq olar turǵyndarǵa sýdaǵy qaýipsizdiktiń negizgi erejelerin eske saldy: júzý bilmeıtin jaǵdaıda belden joǵary sýǵa kirmeý, balalardy qaraýsyz qaldyrmaý, alkogoldik ishimdik ishken kúıde shomylmaý, beıtanys jerlerde sýǵa túspeý, qarańǵy ýaqytta shomylmaý jáne júzýge arnalmaǵan zattardy paıdalanbaý. Budan bólek, qaıyqtar men basqa da júzý quraldarynda mindetti túrde qutqarý keýdeshesin kıip júrý qajet.
Oqıǵalar men tótenshe jaǵdaılar týraly 112 nómirine dereý habarlaý qajet.
Buǵan deıin Taldyqorǵanda joǵalyp ketken balanyń denesi Qaratal ózeninen tabylǵanyn habarlaǵan bolatynbyz.
