Qaraǵandyda eki mıllıard teńgege jýyq qarjy jymqyrǵan kópbalaly áıelge qatysty sot bastaldy

QARAǴANDY. KAZINFORM – Qaraǵandyda el nazaryn aýdarǵan iri alaıaqtyq is boıynsha sot bastaldy. Tergeý dereginshe, jeti balanyń anasy el kóleminde 447 adamdy aldap, shamamen eki mıllıard teńgege jýyq qarjyny zańsyz ıemdengen.

Tergeý materıaldaryna sáıkes, aıyptalýshy áıel Qytaı, Túrkııa jáne Reseıden taýar jetkizýmen aınalysqan ınternet-dúken júrgizgen. Onda turmystyq zattardan bastap, jıhaz, turmystyq tehnıka, tipti avtokólik pen kvadrotsıklge deıingi túrli taýar usynylǵan. Satyp alýshylardy arzan baǵa, tıimdi jeńildikter jáne áleýmettik jelilerdegi jarnamalar qyzyqtyrǵan. Tipti dúkendi tanymal blogerler de nasıhattap, senim týdyrǵan.

Bastapqy kezeńde tapsyrystar ýaqytyly jetkizilip otyrǵan. Bul klıentterdiń senimin odan ári arttyrǵan. Alaıda ýaqyt óte kele iri kólemdegi tapsyrystar oryndalmaǵan. Aqysyn aldyn ala tólegen satyp alýshylar aptalap kútken taýarlaryn ala almaǵan. Keıbiri satýshyǵa shaǵymdanǵanda, ol kerisinshe qorqytyp, «polıtsııaǵa júginseńder, aqshalaryńnan da, tapsyrystaryńnan da aıyrylasyńdar» dep jaýap bergen.

Alaıaqtyqtyń qurbany bolǵan 447 adam elimizdiń ár óńirinen jınalǵan. Olar aqshalary men tapsyrystarynan aıyrylǵanyn aıtady. Tergeý barysynda anyqtalǵandaı, aıyptalýshy sol ýaqytta qymbat kólik minip, sándi ómir súrgen. Jábirlenýshiler óz betterinshe dálelder jınap, istiń qozǵalýyna sebepker bolǵan.

Kúdikti áıel ustalǵannan keıin júkti ekenin rastaıtyn medıtsınalyq anyqtama usynǵan. Osy sebepti ol qamaýdan bosatylyp, úıqamaqqa aýystyrylǵan. Degenmen jábirlenýshiler sot tyńdalymynda isti qaıta tergeýge jiberýdi talap etti. Olardyń paıymynsha, aıyptalýshy jalǵyz áreket etpeı, uıymdasqan toptyń quramynda bolýy múmkin.

Aıyptalýshy óz kinásin moıyndamaı otyr. Ol kóptegen jábirlenýshini tanymaıtynyn jáne olardyń qarajaty óz esepshotyna túspegenin alǵa tartýda. Sondaı-aq ol sot protsesinde óz beınesin túsirýge tyıym salǵan.

Bul is qoǵamda keń rezonans týdyrdy. Áleýmettik jelilerde jábirlenýshiler birigip, ózderiniń bastan keshken jaǵdaılaryn bólisip jatyr. Olar ınternet-saýda salasynda baqylaýdy kúsheıtýdi, al onlaın dúkenderdiń jumysyn qatań retteýdi surap otyr.

Osyǵan deıin mamandar ınternet alaıaqtary aılasyn asyrý úshin túrli ádisterdi paıdalanatynyn aıtty. Onyń ishinde eń qaýiptisi adam psıhologııasyna áser etý arqyly jasalatyn alaıaqtyq áreketter ekenin atap ótken bolatyn.