Qaraǵandyda eki balanyń máıiti tabyldy
ASTANA. KAZINFORM – Qaraǵandy oblysynyń turǵyny óz balalaryn óltirdi degen kúdikke ilindi. Sumdyq qylmys Buqar jyraý aýdanyna qarasty shaǵyn aýyldardyń birinde bolǵan.
Qaraǵandy oblystyq polıtsııa departamenti baspasóz qyzmetiniń málimetinshe, 2 jáne 4 jastaǵy balalar zorlyq-zombylyq belgilerimen tabylǵan.
Aýyl turǵyndary anasy balalaryn tunshyqtyryp óltirgenin aıtady. Onyń mundaı áreketke ne úshin barǵany beımálim.
Qaraǵandy oblystyq polıtsııa departamentiniń baspasóz qyzmeti oqıǵaǵa qatysty túsinikteme berdi.
«4 sáýirde Buqar jyraý aýdanyndaǵy eldi mekenderdiń birinde zorlyq-zombylyq belgisi bar 2 jáne 4 jastaǵy balalardyń máıiti tabyldy. Sotqa deıingi tergeý bastaldy. Qylmys jasady degen kúdikpen balalardyń anasy ustaldy. Ol ýaqytsha ustaý ızolıatoryna qamaldy. Saraptama taǵaıyndaldy», - dep habarlady oblystyq polıtsııa departamentiniń baspasóz qyzmeti.
Vedomstvo tergeý múddesine saı ózge aqparatty jarııalaýǵa bolmaıtynyn aıtty.
