Qaraǵandyda amýr jolbarysynyń eki marǵaýy dúnıege keldi
QARAǴANDY. KAZINFORM – Qaraǵandy haıýanattar baǵynda kópten kútken qýanyshty oqıǵa boldy – Mııa jáne Batyr esimdi amýr jolbarystary jubynyń eki marǵaýy ómirge keldi. Shala týǵan ári álsiz bolyp týǵanymen, búginde olar tez ósip, aıtarlyqtaı shırap qalǵan.
Marǵaýlar 30 sáýir kúni dúnıege kelgen. Týǵan kezdegi salmaqtary nebári 450 jáne 530 gramm bolǵan. Barlyq marǵaýlar sekildi alǵashqy kúnderi olardyń kózderi ashylmaı, erekshe kútimdi qajet etti. Alaıda bir aıdyń ishinde olar aıtarlyqtaı salmaq qosyp, qazir árqaısysynyń salmaǵy eki keliden asty.
Haıýanattar baǵy qyzmetkerleriniń aıtýynsha, marǵaýlardyń tábeti jaqsy, qarqyndy damyp keledi jáne ózderin jaqsy sezinedi. Al anasy Mııa tólderine erekshe qamqorlyq tanytyp otyr. Bul – onyń ekinshi ret tóldeýi.
– Mııa analyq mindetin óte jaqsy atqaryp júr. Kúshikter belsendi, jaqsy ósip keledi jáne kún saıyn shırap barady, – deıdi haıýanattar baǵynyń qyzmetkerleri.
Mamandardyń málimetinshe, eki marǵaý da – erkek.
Amýr jolbarysy – álemdegi eń sırek kezdesetin ári eń iri jolbarys túrleriniń biri. Sondyqtan haıýanattar baǵynda mundaı tóldiń dúnıege kelýi mamandar tarapynan sırek kezdesetin jyrtqyshtardy saqtaýdaǵy mańyzdy oqıǵa retinde baǵalanyp otyr.
Eske salsaq, osyǵan deıin Memleket basshysy Qasym-Jomart Toqaev Reseı prezıdenti Vladımır Pýtınge Qazaqstan aýmaǵynda jolbarysty qaıta jersindirý isinde qoldaý kórsetkeni úshin rızashylyǵyn bildirdi.
