Qaraǵandyda daýyl ushyryp áketken 30-dan astam turǵyn úıdiń shatyry jóndeledi
Qaraǵandy qalasynda daýyl kezinde zardap shekken 33 kópqabatty úıdiń shatyry jóndeledi. Qalypqa keltirý jumystaryn jańa jylǵa deıin aıaqtaý kózdelip otyr, dep habarlaıdy Kazinform.
Oblys ákiminiń tapsyrmasy boıynsha qatty jel saldarynan qalada tabıǵı sıpattaǵy, jergilikti aýqymdaǵy TJ rejımi jarııalanǵan bolatyn. Bul týraly tıisti sheshimge qala ákimi qol qoıdy.
«Biz 33 kópqabatty turǵyn úıdiń shatyrlaryn qalpyna keltiretin bolamyz. Olardyń mekenjaılarymen fotodan tanysa alasyzdar. Basqa úılerdiń turǵyndarynyń ótinishterin turǵyn úı ınspektsııasy bóliminiń mamandary qarastyratyn bolady. Sodan keıin olarǵa úılerdi jóndeý jumystarynyń jalpy tizimine engizý nemese qabyldamaý boıynsha qorytyndy beriledi. Mádenıet, sport, bilim berý obektileri boıynsha qabyldanǵan sheshim negizinde jetekshilik etetin basqarmalar óz ǵımarattaryndaǵy shatyrlardy qalpyna keltirý úshin tıisti qarajatty bóledi», - dep jazdy áleýmettik jelide Qaraǵandy qalasynyń ákimi Meıram Kojýhov.
Bıznes nysandary men zardap shekken avtomobılder boıynsha zańnamaǵa sáıkes menshik ıeleri saqtandyrý kompanııalaryna júginýi kerek bolady.
«Aldymyzda jańa jylǵa deıin KTÚ barlyq shatyrlaryn qalpyna keltirý mindeti tur. Árıne, eń aldymen shatyrlary eń kóp zardap shekken úılermen aınalysatyn bolamyz. Qazirgi ýaqytta barlyq qajetti rásimder júrgizildi, merdigerlik uıymdar óz jumystaryna kirisip jatyr», - dep qosty qala ákimi.
