Qaraǵandyda dárigerlerge qol kótergen eki adam jazalandy

QARAǴANDY. KAZINFORM - Qaraǵandydaǵy oblystyq balalar aýrýhanasynda dárigerlerge shabýyl jasaǵan er adam eki aı merzimge qamaýǵa alyndy. Onymen birge bolǵan ekinshi azamat 10 táýlikke qamaldy, dep habarlaıdy Kazinform agenttiginiń tilshisi.

Qaraǵandy oblystyq polıtsııa departamentiniń málimetinshe, dárigerlerdi uryp-soǵý deregi boıynsha qylmystyq is qozǵalǵan. Sottyń sanktsııasymen basty kúdikti eki aıǵa ýaqytsha ustaý ızolıatoryna qamaldy.

Oqıǵaǵa qatysy bar ekinshi azamat — negizgi kúdiktiniń jaqyn týysy — polıtsııa qyzmetkerleriniń zańdy talabyna baǵynbaǵany jáne medıtsına qyzmetkerlerine balaǵat sózder aıtqany úshin jaýapqa tartyldy.

- K. esimdi azamattyń kinási beınebaqylaý kamerasyndaǵy jazbalar men jınaqtalǵan is materıaldary negizinde dáleldendi. Qaraǵandy qalasynyń mamandandyrylǵan ákimshilik sotynyń qaýlysymen ol QR Ákimshilik quqyq buzýshylyq týraly kodeksiniń 80-1-baby 2-bóligi (medıtsına qyzmetkerine qurmet kórsetpeý), 434-baby 1-bóligi (usaq buzaqylyq) jáne 667-baby 1-bóligi (polıtsııa talabyna baǵynbaý) boıynsha kináli dep tanylyp, ÁQBtK-niń 58-baby 2-bóligine sáıkes 10 táýlikke ákimshilik qamaýǵa alyndy, - dep málimdedi Qaraǵandy qalasynyń mamandandyrylǵan ákimshilik sotynyń baspasóz qyzmeti.

Aıta keteıik, bul oqıǵa 12 maýsym kúni bolǵan. Qaraǵandy oblysynyń 38 jastaǵy turǵyny medıtsınalyq mekemede týyndaǵan janjal kezinde eki dárigerge dene jaraqatyn salǵan. Polıtseıler ony oqıǵa ornynda ustap, ýaqytsha ustaý ızolıatoryna qamaǵan.