Qaraǵandyda dárigerdiń JI-kómekshisi men vırtýaldy patsıent jasalyp jatyr

ASTANA. KAZINFORM — Qaraǵandy medıtsına ýnıversıteti dárigerdiń jumysyn jeńildetetin jasandy ıntellekt kómekshisin jáne bolashaq dárigerlerge arnalǵan vırtýaldy patsıent modelin ázirlep jatyr. Jańa tehnologııalar medıtsınalyq qujattardy rásimdeýge ketetin ýaqytty qysqartyp, stýdentterdiń klınıkalyq daǵdylaryn jetildirýge baǵyttalǵan. Bul týraly DSM málim etti.

Qaraǵandyda dárigerdiń JI-kómekshisi men vırtýaldy patsıent jasalyp jatyr
Foto: Kazinform\JI

Qaraǵandy medıtsına ýnıversıteti AI-Sana ulttyq baǵdarlamasy aıasynda densaýlyq saqtaý men medıtsınalyq bilim berý salasyna jasandy ıntellektini engizý baǵytynda birneshe jobany júzege asyryp jatyr. Solardyń biri — dárigerlerge arnalǵan AiMed Voice ıntellektýaldy kómekshisi.

Jobanyń negizgi maqsaty — dáriger men patsıent arasyndaǵy áńgimeni avtomatty túrde óńdep, qajetti medıtsınalyq aqparatty júıeleý. Bul dárigerlerdiń qujat toltyrýǵa jumsaıtyn ýaqytyn qysqartyp, patsıentterdi tekserýge jáne emdeý boıynsha sheshim qabyldaýǵa kóbirek kóńil bólýine múmkindik beredi.

Ýnıversıtet oqytýshylary men stýdentterinen quralǵan komanda dárigerdiń JI-kómekshisiniń alǵashqy jumys isteıtin prototıpin ázirlep úlgerdi.

Joba ázirleýshileri medıtsınalyq aqparattyń qaýipsizdigine jáne patsıentterdiń jeke derekterin qorǵaýǵa erekshe mán berip otyr. Sondyqtan ázirge júıe zertteý jáne synaq kezeńinde. Ony dárigerlerdiń kúndelikti jumysyna engizý úshin aldymen qaýipsizdigi men senimdiligi jan-jaqty tekserilýi kerek.

Stýdentter vırtýaldy patsıentpen tájirıbe jınaıdy

Ýnıversıtet mamandary jasandy ıntellektini medıtsınalyq bilim berý salasynda qoldanýdyń taǵy bir baǵytyn qolǵa alǵan. Olar bolashaq dárigerlerge arnalǵan «vırtýaldy patsıent» sımýlıatoryn ázirleýdi josparlap otyr.

Bul tehnologııa stýdentterge tsıfrlyq ortada túrli klınıkalyq jaǵdaılardy pysyqtaýǵa múmkindik beredi. Olar vırtýaldy naýqastyń aýrý tarıhyn jınap, belgilerin taldap, klınıkalyq oılaý qabiletin damytady jáne emdeý boıynsha sheshim qabyldaýdy úırenedi.

Jobanyń mańyzdy ereksheligi — oqý barysynda naqty patsıentterdiń jeke derekteri paıdalanylmaıdy. Onyń ornyna arnaıy jasalǵan sıntetıkalyq derekter qoldanylady.

Jasandy ıntellekt dárigerdi almastyrmaıdy

AI-Sana baǵdarlamasyna qatysý ýnıversıtetke jańa tsıfrlyq sheshimder ázirleýmen qatar, bolashaq medıtsına mamandaryn jasandy ıntellektini saýatty ári jaýapkershilikpen paıdalanýǵa úıretýge múmkindik beredi.

Stýdentter jańa tehnologııalardyń múmkindikterimen qatar, olardyń shekteýlerin de túsinip, JI usynǵan aqparatty synı turǵydan baǵalaýdy úırenedi.

Ýnıversıtet aldaǵy ýaqytta ǵylymı zertteýlerdi jalǵastyryp, stýdentterdi jańa jobalarǵa tartýdy jáne tsıfrlyq tehnologııalardy oqý úderisine engizýdi josparlap otyr.

Bul rette patsıentterdiń jeke derekterin qorǵaý jáne medıtsınalyq sheshim qabyldaýda dárigerdiń negizgi rólin saqtaý basty talap bolyp qala beredi.