Qazaqstan nómirin Grýzııanikimen jasyryp júrgen júrgizýshi jazalandy
ASTANA. KAZINFORM — Qaraǵandy oblysynda kóliginiń shynaıy nómirin Grýzııanyń memlekettik nómirimen jaýyp qoıǵan DAF júrgizýshisi ustaldy. Ol kólik basqarý quqyǵynan aıyrylyp, ákimshilik qamaýǵa alyndy.
Oqıǵa 7 qazanda Astana — Qaraǵandy avtojolynda bolǵan. Saǵat 12:30 shamasynda polıtsııaǵa QAJ júıesi arqyly Astana baǵytynan Qaraǵandyǵa qaraı kele jatqan júk kóliginde jalǵan memlekettik nómir bolýy múmkin ekeni týraly aqparat túsken.
Patrýldik polıtsııa ekıpajdary birden jolǵa shyǵyp, Osakarovka kenti mańyndaǵy 111-shaqyrymda DAF júk kóligin toqtatqan.
Tekserý kezinde kúdik rastaldy. Polıtsııa kóliktiń Qazaqstanǵa tıesili naqty nómirleriniń ústine Grýzııanyń memlekettik tirkeý belgileri ornatylǵanyn anyqtady. Osylaısha júrgizýshi kóliktiń shynaıy tirkeý derekterin jasyrýǵa tyrysqan.
Júk kóligi arnaıy turaqqa qoıylyp, 35 jastaǵy júrgizýshige Ákimshilik quqyq buzýshylyq týraly kodeksiniń 590-babynyń 3 jáne 4-bólikteri boıynsha ákimshilik hattama toltyryldy.
Іsti Osakarov aýdanynyń soty qarap, júrgizýshini bir jylǵa kólik basqarý quqyǵynan aıyrdy jáne ákimshilik qamaýǵa aldy.
Polıtsııa málimetinshe, jyl basynan beri Qaraǵandy oblysynda jalǵan nómir paıdalanǵan 87 júrgizýshi anyqtalǵan.
Polıtsııa memlekettik nómirdi jasyrý, aýystyrý nemese jalǵan nómir paıdalaný zań boıynsha jaýapkershilikke ákeletinin eskertti.
Eske salaıyq, buǵan deıin «QazAvtoJol» júk kóliginiń salmaǵyn ólsheýden jaltarǵandarǵa jaýapkershilik engizýdi usynǵanyn habarlaǵanbyz.
