Qaraǵandyda burynǵy áıelin pyshaqtap óltirgen ormanshy 14 jylǵa sottaldy

Qaraǵandy oblysy Botaqara aýylynyń turǵyny ajyrasý kezinde burynǵy jubaıyn pyshaqtap óltirdi. Er adam ań aýlaıtyn pyshaǵyn burynǵy áıeline úsh ret suǵyp alǵan. Áıel alǵan jaraqatynan qaıtys boldy, dep habarlaıdy Kazinform.

Qaraǵandy oblysynyń qylmystyq ister jónindegi mamandandyrylǵan aýdanaralyq sotynda adam óltirý jáne sýyq qarýdy zańsyz túrde alyp júrý faktisi boıynsha is qaraldy.

26 mamyrda Botaqara kentiniń AHAT ǵımaratynda jergilikti turǵyn men onyń burynǵy áıeliniń arasynda janjal bolǵan. 

Sodan keıin ol ańshy pyshaǵyn sýyryp alyp, burynǵy áıeliniń shabyna jáne sol jaq jaýyrynynyń astyna eki soqqy jasaǵan.

Jábirlenýshi alǵan jaraqatynan Buqar jyraý aýdany ortalyq aýrýhanasynda qaıtys boldy.

Sottalýshynyń kinási kýálardyń aıǵaǵymen, zattaı dáleldememen, saraptama qorytyndysy jáne basqa is materıaldarymen dáleldendi.

Prokýror aıyptalýshyny eki bap boıynsha kináli dep tanyp, 14 jylǵa bas bostandyǵynan aıyrý jazasyn taǵaıyndaýdy surady.

«Sot úkimimen Ý. adam óltirgeni jáne sýyq qarýdy zańsyz alyp júrgeni úshin kináli dep tanylyp, oǵan bas-aıaǵy 14 jyl bas bostandyǵynan aıyrý jazasy taǵaıyndaldy. Jazany qylmystyq-atqarý júıesiniń ortasha mekemesinde óteıdi. Ý-dyń jazasyn jeńildetetin jáne aýyrlatatyn mán-jaı anyqtalǵan joq. Jaza taǵaıyndaý kezinde sot qylmystyń jasalý jaǵdaıyn, sottalýshynyń jasalǵan qylmysqa degen ustanymyn jáne jábirlenýshi taraptyń pikirin nazarǵa aldy», - dep málimdedi Qaraǵandy oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.

Úkim zańdy kúshine engen joq.