Qaraǵandyda bir kúnde 150 adam kóktaıǵaqta jyǵylyp, dárigerge júgingen
Qaraǵandy oblysynda kóktaıǵaq saldarynan sońǵy táýlikte zardap shekkender sany eki ese artty. Qala travmatologtary halyqty kóshede abaı bolýǵa jáne qaýipsizdik erejelerin saqtaýǵa shaqyrady, dep habarlaıdy Kazinform tilshisi.
Dárigerlerdiń aıtýynsha, ótken táýlikte dene jaraqatymen kelip túsken naýqastar sany artqan.
3 jeltoqsanda 76 patsıent óńirdiń jaraqat pýnktine júginse, 4 jeltoqsanda patsıentterdiń sany 2 ese artqan.
«4 jeltoqsan kúni Qaraǵandy oblysynyń medıtsınalyq uıymdaryna 150 adam júgindi. Bul rette statsıonarlyq emdeýge jatqyzylǵan patsıentter sanynyń artýy da baıqalady. Biraq munda jol-kólik oqıǵasynan túrli jaraqaty bar patsıentter de, alkogolden ýlanǵan, turmystyq jaraqaty bar patsıentter de boldy. Sondaı-aq, kóshede jaraqat alǵan, taıyp ketken nemese kóktaıǵaqta qulap jaraqattanǵan naýqastar da kóbeıdi», — deıdi Qaraǵandy oblysynyń travmatologııa qyzmeti ahýal ortalyǵynyń basshysy Erik Shonbaev.
Dárigerler kóktaıǵaq kezinde kóshede júrip-turýdyń qarapaıym erejelerin saqtaý kerektigin taǵy bir ret eske saldy.
«Turǵyndarǵa arnalǵan usynysymyz jyldan jylǵa ózgerissiz qalady. Qys túskeli abaı bolǵan jón. Tabany taıǵaq emes aıaq kıim, jaqsy protektory bar taıǵaq emes etik tańdaý kerek. Sondaı-aq aıaǵyńyzdyń astyna, qaıda bara jatqanyńyzǵa qarap júrińizder. Sebebi bul óte mańyzdy. Jaıaý júrginshilerge keletin bolsaq, arnaıy ótkelden ótip bara jatqanda kóliktiń tolyq toqtaǵanyna kóz jetkizgen soń ǵana joldan ótińizder. Óıtkeni kóktaıǵaq kezinde kóliktegi tejeý joly aıtarlyqtaı artady. Jáne bul 2 nemese 3 metr emes. Ol ondaǵan metrdi quraıdy. Ortasha alǵanda 60 km/saǵ jyldamdyqpen kele jatqan kóliktiń tejeý joly kóktaıǵaq kezinde 30 metrge deıin jetýi múmkin. Al qulaqqap pen kapıýshon kıgen jaıaý júrginshiler jan-jaǵyna qaramaı, jolǵa júgirip shyqqanda júrgizýshiler kóligine ıe bola almaı qalady. Nátıjesinde ózi zardap shegedi jáne osylaısha júrgizýshini de tyǵyryqqa tireıdi. Júrgizýshilerden jolda muqııat bolýdy, jaryspaýdy ótinemiz», — dedi Erik Shonbaev.
Sońǵy táýlikte oblysta 48 jol apaty boldy, onda 11 adam zardap shekken.
