Qaraǵandyda bir beıitke baılanysty eki otbasy daýlasyp jatyr
QARAǴANDY. KAZINFORM – Qaraǵandy oblysynda bir jarym jyl buryn jerlengen áıeldiń máıiti qaıta qazyp alyndy. Bir qabirde óz týysy jatyr dep sengen eki otbasynyń arasyndaǵy daý sotqa deıin jetip, aqyry eksgýmatsııa jasaý týraly sheshim qabyldanǵan. Endi kóptiń kókeıindegi kúmánge núkteni sot-medıtsınalyq saraptama qoıýǵa tıis.
Qaraǵandy oblysyndaǵy zırattardyń birinde bir mazardyń basyna jınalǵan eki otbasy da dál osy jerde óz jaqyny jerlengenine kámil senimdi. Qos tarap ta marqumdarǵa quran baǵyshtaý úshin molda ertip kelgen. Oqıǵa ornyna polıtsııa qyzmetkerleri men ákimdik ókilderi qatysyp, eksgýmatsııa rásiminiń zań aıasynda ótýin qadaǵalady.
Tergeýshiler jerleý rásimine qatysqan azamattardan jaýap alyp, taraptardyń ýájderin muqııat tyńdady. Mundaı jaǵdaıdyń sırek kezdesetinin quqyq qorǵaý organdary ókilderiniń ózderi de jasyrmady.
Sotqa júgingen Qaraǵandy turǵyny Aıgúl Jamılenovanyń aıtýynsha, anasyn osy zıratqa bir jarym jyl buryn jerlegen. Alaıda araǵa birneshe aı salyp qabir basyna kelgende, beıittiń qorshalyp, ózge adamnyń aty jazylǵan qulpytas ornatylǵanyn kóripti.
– Qarsy tarap marqumnyń boıy shaǵyn bolǵanyn aıtady. Biraq meniń anam da tolyq adam emes edi. Sondyqtan qazir naqty kesip aıtý qıyn. Degenmen dál osy jerde anam jatqanyna esh kúmánim joq. Eger saraptama nátıjesi basqasha shyqsa, barlyq shyǵyndy óz moınyma alamyn. Jerleý rásimine otyzdan astam adam qatysty. Mundaı jaǵdaıda oryn shatastyrý múmkin emes dep esepteımin, – deıdi Aıgúl Jamılenova.
Al ekinshi otbasy da óz dálelderin alǵa tartyp otyr. Olardyń aıtýynsha, Aıgúl Jamılenovanyń anasy jerlengennen keıin bir apta ótken soń dál osy orynǵa óz týystaryn qoıǵan. Tipti jerleýden keıin túsirilgen beınejazbalary da bar eken. Aıtýlarynsha, olar qabirge jıi kelip, duǵa baǵyshtap turǵan, keıin qorshaýyn ornatqan.
– Biz marqumdy jerlegennen keıin qabirdi arnaıy lentamen qorshap, belgilerin qaldyrǵanbyz. Olar jeltoqsanda keldik deıdi. Sonda bizdiń belgilerimizdi alyp tastap, ornyna ózderinkin qoıǵany ma? Sotta da olardyń sózderi bir-birine sáıkes kelmedi. Árýaqty tynysh jatqyzbaı, qabirdi qaıta qazýǵa májbúrlegeni janymyzǵa qatty batty. Bul bizge de aýyr moraldyq soqqy boldy, – deıdi Quralaı Maılybaeva.
Qos taraptyń da óz shyndyǵy bar. Alaıda dál qazir bul jerde bir ǵana múrde jatqany belgili.
Bir jarym jyldan keıin qaıta ashylǵan qabirden alynǵan máıit sot-medıtsınalyq saraptamaǵa jiberildi. Mamandar qorytyndyny bir aı shamasynda jarııalaýy múmkin. Sol kezde ǵana bir qabir úshin daýlasyp otyrǵan eki otbasynyń qaısysy qateleskeni anyqtalady.
Buǵan deıin aqtóbelik turǵyn bir otbasy músheleri úshin zırattan oryn alyp qalmaq bolǵanyn jazdyq.
