Qaraǵandylyq baıkerler toby referendýmda daýys berdi
QARAǴANDY. KAZINFORM - Kenshiler shaharyndaǵy baıker klýbynyń músheleri Qazaqstanda AES salý máselesi boıynsha referendýmǵa qatysty. Mototsıkl tizgindegen top Qaraǵandydaǵy №72 referendým ýchaskesinde daýys berdi, dep habarlaıdy Kazinform agenttiginiń tilshisi.
Saılaý ýchaskesine «Shyńǵyshan» baıker klýbynyń músheleri ózderiniń temir tulparlarymen keldi. Pikirlester jumylyp, ózderiniń azamattyq boryshyn oryndap, daýys berýge qatysý sheshimin qabyldaǵandaryn aıtady.
«Meniń oıymsha, bul referendým Qazaqstan halqyna qandaı da bir máselege qatysty óz pikirin bildirýge kómektesedi, halyqtyń pikirin eskerý qajet. Óz jeke oıym osyndaı. Mundaı sharalar memlekettiń, energetıka salasynyń, energııa qyzmetine qatysty barlyq mańyzdy máselelerge arnalýy kerek. Óz pikirińdi bildirý mańyzdy bul rette. Saılaýdy da, referendýmdy da eshqashan jibergen emespin», - deıdi baıkerler klýbynyń múshesi Dmıtrıı Kotsar.
Aıta ketý kerek, klýb músheleri osyndaı is-sharalarǵa qatysýda bir-birin qoldap qana qoımaı, balalaryna úlgi kórsetedi. Baıkerlerdiń biri Alekseı Lapshın referendýmǵa 10 jasar qyzymen birge keldi.
«Men búgin qyzymmen keldim. Jalpy, bul bizdiń dástúrge engendikten, barlyq otbasy músheleri bizdiń elimizdiń bolashaǵyna qatysty óz oıyn ortaǵa salýy tıis jáne janashyrlyq tanytýy kerek. ıAǵnı, damý turǵysynan qandaı da bir sheshim qabyldaý biz úshin mańyzdy. Biz osyǵan deıin úıimizde aldaǵy referendým týraly áńgimelestik jáne talqyladyq. Balam «Áke, bul ne jáne ne úshin qajet?» dep surady. Bul elimizdiń damýy úshin kerek ekenin túsindirdik. Tıisinshe, meniń oıymsha, bul ár otbasy úshin úırenshikti bolýy kerek. Óıtkeni biz bolashaǵymyzǵa nemquraıly qaramaýymyz kerek», - dep esepteıdi Alekseı Lapshın.
Eske salaıyq, búgin qazaqstandyqtar atom elektr stantsııasyn salý máselesi boıynsha jalpyulttyq referendýmda daýys berip jatyr.
Respýblıkalyq referendým bıýlleteninde bir ǵana saýal bolady:
— Siz Qazaqstanda atom elektr stantsııasyn salýǵa kelisesiz be?
Daýys berýshi jaýaptyń eki nusqasynyń birin tańdaıdy:
— «Iá, kelisemin» nemese, «Joq, kelispeımin».
1 shildedegi jaǵdaı boıynsha el kóleminde 12 176 968 adam referendýmda daýys berýge haqyly.
