Qaraǵandyda balalar úıiniń tárbıelenýshilerinen aqsha bopsalaǵan qylmystyq top ustaldy
QARAǴANDY. KAZINFORM – Qaraǵandyda polıtsııa departamentiniń uıymdasqan qylmysqa qarsy kúres basqarmasynyń jedel qyzmetkerleri prokýratýramen ózara is-qımyl barysynda áleýmettik osal sanattaǵy azamattarǵa arnalǵan arnaıy memlekettik tólemderden aqsha bopsalaýǵa qatysy bar uıymdasqan toptyń zańsyz áreketin áshkereledi.
Іshki ister mınıstrliginiń málimetinshe, jedel is-sharalar barysynda óńirdegi balalarǵa arnalǵan mekemelerdiń biriniń tárbıelenýshileri qylmyskerlerdiń qurbany bolǵan. Keıingi jarty jyl ishinde kúdiktiler aldaý, qorqytý jáne fızıkalyq kúsh qoldaný arqyly birneshe jábirlenýshiden jalpy somasy 10 mıllıon teńgeden astam qarajatty ıemdengen. Olardy arnaıy shottardan aqsha sheshýge, sondaı-aq mıkroqarjy uıymdarynda nesıe rásimdeýge májbúrlegen.
– Júrgizilgen jedel-izdestirý is-sharalary kezinde kúdiktilerden avtomatty atys qarýyna arnalǵan oqjatarlar jáne 100-den astam oq-dári tárkilendi. Atalǵan derek boıynsha bopsalaý belgilerimen sotqa deıingi tergep-tekserý bastaldy. Barlyq kúdikti ustaldy. Olarǵa 10 jylǵa deıin bas bostandyǵynan aıyrý jazasy taǵaıyndalýy múmkin, - delingen habarlamada.
Polıtsııa ustalǵan qylmystyq toptyń basqa da osyǵan uqsas qylmystarǵa qatystylyǵyn anyqtaý boıynsha tergeý jumystaryn júrgizip jatyr.
Buǵan deıin Abaı oblysynda iz-túzsiz joǵalǵan bala qudyqtan tabylǵanyn habarlaǵanbyz.