Qaraǵandyda azyq-túlik baǵasyn kótergen 70-ten astam kásipkerge aıyppul salyndy
ASTANA.KAZINFORM — Qaraǵandyda áleýmettik mańyzy bar azyq-túlik baǵasyn jáne saýda erejeleriniń saqtalýyn tekserý jalǵasyp jatyr. Reıd barysynda ondaǵan kásipkerge aıyppul salynyp, eskertýler berildi.
Qaraǵandy oblysynda áleýmettik mańyzy bar azyq-túlik baǵalaryn qadaǵalaý kúsheıtildi. Tekserý jumystary aımaqtaǵy iri bazarlarda júrgizildi. Mamandar satýshylardyń saýda jáne salyq zańnamasyn saqtaýyn, sondaı-aq baǵa qalyptasý mehanızmderin tekserdi.
Buǵan deıin óńirde ónim baǵasynyń ósýine áser etetin deldaldyq shemalardy anyqtaýmen aınalysatyn arnaıy komıssııa jumys istegen bolatyn. Jańa tekserýler osy jumystyń jalǵasy bolyp otyr.
Negizgi maqsat — baǵany qalyptastyrý júıesin aıqyn etý jáne áleýmettik mańyzy bar taýarlardyń negizsiz qymbattaýyna jol bermeý. Basty nazar «Saýda qyzmetin retteý týraly» zańynyń talaptaryn saqtaýǵa aýdaryldy.
Reıd kezinde mamandar birqatar zańbuzýshylyqtardy anyqtady. Tekserý nátıjesinde 21 kásipker ákimshilik jaýapkershilikke tartyldy. Saýda núkteleriniń ıelerine anyqtalǵan buzýshylyqtardy joıý týraly eskertýler berildi.
Baqylaýshy organdardyń málimetinshe, bıyl jyl basynan beri Qaraǵandy oblysynda 81 bıznes sýbektisi tekserilgen, 73-ine ákimshilik shara qoldanylǵan. Olardyń qatarynda kóterme jetkizýshiler, sýpermarketter jáne dúkender bar.
Salynǵan aıyppuldardyń jalpy somasy 2 mıllıon teńgeden asty. Mamandar óńirdegi saýda jelilerin qadaǵalap, áleýmettik mańyzy bar taýarlardyń negizsiz qymbattaýyna jol bermeý maqsatynda jumys jalǵasatynyn atap ótti.
Aıta keteıik, Qyzylordada suıytylǵan gaz baǵasynyń ósýi túsinispeýshilik týǵyzdy.
Sondaı-aq Abaı oblysynda kómir baǵasyn qymbattatqan kompanııaǵa aıyppul salyndy.
