Qaraǵandyda azyq-túlik baǵasy zańsyz kóterilgen: 155 kásipker jaýapqa tartyldy
ASTANA. KAZINFORM – Qaraǵandy qalasyndaǵy dúkenderdiń biri kúrishtiń kelisin 205 teńgeden satyp alyp, ony tutynýshylarǵa 556 teńgeden satqan. ıAǵnı taýarǵa 160%-dyq saýda ústemesi qosylǵan, dep habarlaıdy QR Saýda jáne ıntegratsııa mınıstrliginiń baspasóz qyzmeti.
QR SIM Qaraǵandy oblysy boıynsha Saýda jáne tutynýshylardyń quqyqtaryn qorǵaý departamentiniń memlekettik baqylaýy barysynda bul jaǵdaı anyqtalyp, kásipker ákimshilik jaýapkershilikke tartyldy. Nátıjesinde kúrishtiń baǵasy 235 teńgege deıin tómendetildi.
-Bul – Qaraǵandy oblysynda áleýmettik mańyzy bar azyq-túlik taýarlarynyń baǵasyna júrgizilgen baqylaý kezinde anyqtalǵan jaǵdaılardyń biri ǵana. Máselen, qatty irimshiktiń satyp alý baǵasy 3 353 teńge bolǵanymen, saýda jelilerine ol 5 517 teńgeden jetkizilgen. Osylaısha saýda ústemesi 64%-dy quraǵan. Tekserý nátıjesinde taýardyń baǵasy 3 855 teńgege deıin tómendetilip, aıyrmashylyq 1 662 teńgeni qurady.
Qara shaı boıynsha da aıtarlyqtaı aıyrmashylyq anyqtaldy. Satyp alý baǵasy 472 teńge bolǵan ónim 1 079 teńgeden satylǵan. Saýda ústemesi 130%-ǵa jetken. Ákimshilik jaýapkershilik qoldanylǵannan keıin onyń baǵasy 496 teńgege deıin tómendetilip, 583 teńgege arzandady.
Taýyq farshynyń baǵasy da sáıkestendirildi. Áý basta kásipker 1 655 teńgege satyp alyp, 45 paıyzǵa deıin saýda ústemesin zańsyz arttyryp, 2 400 teńgeden satqan. Baqylaý sharalarynan keıin taýardyń baǵasy 1 903 teńgege deıin tómendetildi,-delingen habarlamada.
Sondaı-aq onda jyl basynan beri Qaraǵandy oblysynda saýda salasyndaǵy zańnamanyń saqtalýyna qatysty 170 kásipkerlik sýbektisine tekserý júrgizilip, onyń 155-i ákimshilik jaýapkershilikke tartylǵany aıtylǵan.
Jaýapqa tartylǵandardyń qatarynda saýda bazarlarynda qyzmetin júzege asyratyn 44 kóterme jetkizýshi jáne 11 kóterme-bólshek saýda dúkeni bar. Bul ótken jyldyń sáıkes kezeńimen salystyrǵanda 39,6%-ǵa kóp. 2025 jyly osy kezeńde 111 kásipkerlik sýbektisi ákimshilik jaýapkershilikke tartylǵan. Al bıyl salynǵan ákimshilik aıyppuldardyń jalpy somasy 4 mln teńgeden asty.
Baqylaý sharalary barysynda másele tek azyq-túlikke belgilenetin saýda ústemesimen shektelgen joq. Kóterme-bólshek saýda bazarlarynda saýda salasyna qatysty 11 jáne salyq zańnamasyna qatysty 11 buzýshylyq anyqtaldy. Sonymen qatar sanıtarııalyq-epıdemıologııalyq baqylaý organdary tarapynan 2 jedel áreket etý sharasy qabyldandy.
-Tekserý kezinde baqylaý-kassa mashınalaryn qoldaný, taýarlarda baǵa belgileriniń bolýy, áleýmettik mańyzy bar azyq-túlik taýarlaryna belgilengen shekti saýda ústemesin saqtaý, sondaı-aq tamaq ónimderin tańbalaý jáne ótkizý talaptary qaraldy. Anyqtalǵan buzýshylyqtar joıylyp, zańnama talaptaryna sáıkestik qamtamasyz etildi,-dep tolyqtyrdy mınıstrlik málimetterin.
Júrgizilgen baqylaý nátıjesinde áleýmettik mańyzy bar azyq-túlik taýarlarynyń birqatary boıynsha baǵa tómendetildi. Bul rette departamenttiń jumysy tek anyqtalǵan buzýshylyqtardy joıýmen shektelmeıdi.
Qaraǵandy oblysynda baǵa monıtorıngi, negizsiz deldaldyq býyndardy anyqtaý jáne áleýmettik mańyzy bar azyq-túlik taýarlary baǵasynyń negizsiz ósýine jol bermeý boıynsha jumystar jalǵasýda. Bul baǵyt Qaraǵandy oblysy boıynsha Saýda jáne tutynýshylardyń quqyqtaryn qorǵaý departamentiniń turaqty baqylaýynda.
Aıta keteıik, elimizde bir apta ishinde áleýmettik mańyzy bar birqatar azyq-túlik arzandady.
