Qaraǵandy mańynda avtobýs buzylyp, 32 adam jolda qalǵan
ASTANA. KAZINFORM — Qaraǵandy oblysynda qutqarýshylar buzylyp qalǵan avtobýstyń jolaýshylaryn evakýatsııalady. Bul týraly QR TJM baspasóz qyzmeti habarlady.
— 112 pýltine «Astana — Qaraǵandy — Almaty» avtojolynyń 180-shaqyrymynda, Temirtaý qalasy mańynda jolaýshylar avtobýsynyń tehnıkalyq aqaýǵa ushyraǵany jáne qutqarýshylardyń kómegi qajet ekeni týraly habarlama tústi, — delingen aqparatta.
Oqıǵa ornyna TJM kúshteri men quraldary jedel túrde jiberildi. Avtobýstan 32 adam, onyń ishinde 4 bala evakýatsııalanyp, jylytý pýnktine jetkizildi.
Jolaýshylardyń arasynda Qytaı Respýblıkasynyń eki jáne Ózbekstan Respýblıkasynyń 2 azamaty bolǵan. Jolaýshylarǵa medıtsınalyq kómek qajet bolǵan joq.
Buǵan deıin Pavlodarda aıazdy kúni jolda qalǵan avtobýstan 35 jolaýshy qutqaryldy.