Qaraǵandyda avtobýs pen jeńil kólik soqtyǵysyp, bir adam qaza tapty
QARAǴANDY. KAZINFORM — 6 qyrkúıek kúni tańerteń Qaraǵandyda jeńil avtokólik pen marshrýttyq avtobýs soqtyǵysyp, apat saldarynan bir adam oqıǵa ornynda qaza tapty.
Jol-kólik oqıǵasy saǵat 07:30 shamasynda K. Marks kóshesiniń boıynda bolǵan. Chevrolet Cobalt avtokóligi men Yutong marshrýttyq avtobýsy soqtyǵysqan.
Apat saldarynan Chevrolet Cobalt kóliginde bolǵan 36 jastaǵy jolaýshy aýyr jaraqat alyp, oqıǵa ornynda kóz jumdy.
Qaraǵandy oblysynyń polıtsııa departamenti jol qozǵalysyna qatysýshylardy qaýipsizdik talaptaryn qatań saqtaýǵa shaqyrdy.
— Júrgizýshiler joldaǵy jáne aýa raıyna qatysty jaǵdaıdy eskere otyryp, qaýipsiz qozǵalys jyldamdyǵyn tańdaýy jáne kólik tizgininde barynsha muqııat bolýy qajet. Jol qozǵalysyna qatysýshylardyń qaýipsizdigi árbir júrgizýshiniń jaýapkershiligine tikeleı baılanysty, — dep málimdedi Qaraǵandy oblysy polıtsııa departamentiniń baspasóz qyzmeti.
Atalǵan jol-kólik oqıǵasy boıynsha sotqa deıingi tergep-tekserý bastaldy. Qazirgi ýaqytta oqıǵanyń barlyq mán-jaıy men sebepteri anyqtalyp jatyr.
Buǵan deıin Aqmola oblysynda jol apatynan «Gazel» jolaýshysy qaza tapqanyn habarlaǵan bolatynbyz.
