Qaraǵandyda aýa raıynyń qolaısyzdyǵynan 200-den asa kólik jolda turyp qaldy

QARAǴANDY. KAZINFORM — Qaraǵandy oblysynda aýa raıynyń qolaısyzdyǵyna baılanysty úsh baǵyttaǵy joldar jabyldy. Saldarynan oblystyń tas joldarynda 200-den asa kólik turyp qaldy.

Qaraǵandy oblysynda burqasynǵa baılanysty saǵat 8:40–tan bastap Qaraǵandy — Astana, Qaraǵandy — Pavlodar jáne Qaraǵandy — Balqash baǵyttary boıynsha joldar jabyldy.

Tańerteńnen 17:00–ge deıin trassalarda 200-den astam avtokólik keptelip qaldy.

Oblystyń jol polıtsııasy men TJD qyzmetkerleri kólik quraldarynyń basym bóligin Qaraǵandyǵa qaıta jiberedi.

— Qurmetti Qaraǵandy oblysynyń turǵyndary men qonaqtary aýa raıynyń nasharlaýyna: jel, boran, joldyń durys kórinbeýine baılanysty qazirgi ýaqytta Temirtaý qalasy — Aqmola oblysy, Qaraǵandy qalasy — Aqsý-Aıýly jáne Qaraǵandy qalasy — Pavlodar oblysynyń shekarasy baǵyttaryndaǵy respýblıkalyq mańyzy bar trassalar jabyldy. Qazirgi ýaqytta joldarda 200-den astam kólik bar. Polıtsııa departamenti alys jol júrýden bas tartýdy suraıdy, — dep habarlady Qaraǵandy oblysynyń PD bastyǵynyń birinshi orynbasary Jasqaırat Qaıyrov.

Oblystyq polıtsııa departamenti bastyǵynyń orynbasary atap ótkendeı, joldyń ashylýy 14 aqpanda tańǵy saǵat 08:00–ge josparlanǵan.

Osyǵan deıin aýa raıyna baılanysty jabylǵan joldar tizimi jarııalanǵan bolatyn.