Qaraǵandyda áskerıler ardagerdi ǵasyrlyq mereıtoıymen quttyqtady
ASTANA. KAZINFORM — Qaraǵandy qalasy Qazybek bı aýdanynyń qorǵanys isteri jónindegi bóliminiń bastyǵy polkovnık Qaırat Táttekenov maıdanger Aleksandr Ilıch Balabasqa Qorǵanys mınıstriniń quttyqtaý hatyn tabystady, dep habarlaıdy Qorǵanys mınıstrliginiń baspasóz qyzmeti.
Qorǵanys vedomstvosynyń ókili mereıtoı ıesine erligi, batyldyǵy men Otanǵa adal qyzmeti úshin shynaıy alǵysyn jetkizdi.
— Sizdiń ómir jolyńyz — tabandylyqtyń, eńbekqorlyq pen elge degen adaldyqtyń úlgisi. Sol sebepti talaıly taǵdyryńyzdy keleshek urpaqqa jetkizý mańyzdy dep bilemiz, — dedi ol.
Aleksandr Ilıch Balabas 1926 jyly dúnıege kelgen. 1942 jyly 5 synypty aıaqtaǵannan keıin shahtada marksheıderlik bólimde syzbashy bolyp eńbek jolyn bastady. 1943 jyly Qyzyl Armııa qataryna shaqyryldy. Oqýyn aıaqtaǵan soń 1944 jyly dańqty marshal Konstantın Rokossovskııdiń qolbasshylyǵyndaǵy 2-Belarýs maıdany 1-Brest dıvızııasynyń 415-atqyshtar polkine jiberildi. Maıdan quramynda kóptegen urys qımyldaryna qatysty.
Kórsetken erligi úshin Aleksandr Ilıch Qyzyl Juldyz, І dárejeli Otan soǵysy ordenderimen jáne birqatar medaldarmen marapattalǵan.
Soǵystan keıin eldi qalpyna keltirýge óz úlesin qosyp, beıbit eńbekke aralasty. Qaraǵandynyń túrli uıymdarynda uzaq jyldar qyzmet etti.
№ 1 qurylys basqarmasynda, «Saranskpromstroı» basqarmasynda júrgizýshi, oblystyq klınıkalyq aýrýhanada býhgalter, «Qaraǵandyýglesbyt» basqarmasynda ekonomıst bolyp jumys istep, keıin josparlaý bólimin basqardy. 1991 jyldan beri zeınet demalysynda.
Aleksandr Ilıch tek ardager ǵana emes, úlken ári tatý otbasynyń ıesi. Ol úsh bala tárbıelep, olardan tórt nemere, bes shóbere súıip otyrǵan súıikti ata. Olar da otbasylyq dástúrlerdi saqtap, maıdanger atalaryn árdaıym maqtan tutady.
Osyǵan deıin pavlodarlyq áskerıler ardagerdi ǵasyrlyq mereıtoıymen quttyqtaǵanyn jazdyq.