Qaraǵandyda asyrap alǵan balalardy azaptady degen qamqorshylarǵa sot úkimi shyqty
QARAǴANDY.KAZINFORM — Qaraǵandy oblysynyń mamandandyrylǵan aýdanaralyq kámeletke tolmaǵandar isteri jónindegi sotynda alty asyrandy balaǵa qatygezdik kórsetti dep aıyptalǵan erli-zaıyptylar men olardyń qyzyna qatysty qylmystyq is boıynsha úkim shyǵaryldy.
Tergeý nusqasyna sáıkes, Qarqaraly aýdanynda turatyn pedagogtar otbasy balalar úıinen patronattyq tárbıege alynǵan balalardy bes jyl boıy júıeli túrde qorlaǵan. Sotta aıtylǵandaı, uldar men qyzdarǵa aýyr sharýashylyq jumystaryn atqartyp, mal baqqyzǵan, uryp-soǵyp, qorlap, ashtyqta ustaǵan.
Tergeý derekterine súıensek, asyrandy balalardy bolmashy tentektigi úshin uryp-soǵyp, kóń aralastyrylǵan nan jeýge jáne ıttiń úıshiginde uıyqtaýǵa májbúrlegen. Sondaı-aq sot barysynda balalardyń ústine qaınaǵan sý quıylyp, qyzdyrylǵan ot kóseýmen kúıdirilgeni týraly da málimetter keltirildi.
Dárigerlerdiń qorytyndysyna sáıkes, balalardyń biriniń denesinen 19 tyrtyq, al ekinshisinen 47 tyrtyq anyqtalǵan. Buǵan deıin jábirlenýshilerdiń biri sotta ózin kilemge orap, ústinen sekirgenderin, sonyń saldarynan esinen tanyp qalǵanyn aıtqan bolatyn. Keıin oǵan bas súıegine birneshe operatsııa jasalyp, nátıjesinde múgedektik alǵan.
Taraptardyń jaryssózi barysynda talqylanǵan máselelerdiń biri — balalardyń biriniń patronattyq otbasyna berilgenge deıingi densaýlyq jaǵdaıy boldy.
Prokýror kámeletke tolmaǵan jábirlenýshilerdiń aıǵaqtaryna kúmán keltirýge negiz joq ekenin málimdedi. Onyń aıtýynsha, olardyń sózderi keshendi sot-psıhologııalyq saraptamanyń qorytyndylarymen rastalǵan.
— Sarapshylardyń qorytyndysyna sáıkes, kámeletke tolmaǵan bala buǵan deıin qandaı da bir psıhologııalyq aýytqýlardan zardap shekpegen, oqıǵalardyń mán-jaıyn durys qabyldap, ózine qatysty jasalǵan áreketterdiń maǵynasyn túsine alǵan. Al oryn alǵan jaǵdaılardan keıin onyń psıhıkalyq buzylysy damyǵan, — dedi prokýror sot otyrysynda.
Alaıda kýálardyń biri buǵan qarama-qaıshy málimdeme jasady. Áıeldiń aıtýynsha, bala patronattyq otbasyǵa túspeı turyp-aq densaýlyǵyna qatysty máselelerge tap bolǵan.
— Bastapqydan-aq balanyń densaýlyǵynda kinárat bary baıqaldy. Ol óte tuıyq boldy, eshkimmen sóılespeıtin jáne únemi temirjol jaqqa qaraı qashyp ketetin. Anasy onyń bala kezinen syrqat ekenin aıtyp, aýrýhanalarǵa jıi aparyp júrgenin jetkizgen edi, — dedi kýá.
Sonymen qatar qorǵaý tarapy jaryssóz barysynda bul is boıynsha tergeý júrgizý kezinde kóptegen kemshilikterge jol berilgenin málimdedi.
Al aıyptalýshylar oryndyǵynda otyrǵan otbasy basshysy óz kinásin moıyndamaı, balalarǵa eshqashan qol kótermegenin jáne olarǵa árdaıym jaqsy qaraǵanyn aıtty. Sondaı-aq ol tergeý kezinde quqyq qorǵaý organdary tarapynan ózine fızıkalyq ári moraldyq qysym kórsetilgenin málimdedi.
Іs boıynsha keltirilgen barlyq dálelder men kýálardyń aıǵaqtaryn eskere otyryp, sýdıa tómendegideı úkim shyǵardy.
— Isabaev Aıan Japyhanuly Qazaqstan Respýblıkasy Qylmystyq kodeksiniń 106-baby 2-bóliginiń 3, 5, 11-tarmaqtarynda, 110-baby 2-bóliginiń 1, 2-tarmaqtarynda jáne 190-baby 3-bóliginiń 1-tarmaǵynda kózdelgen qylmystyq quqyq buzýshylyqtardy jasaǵany úshin kináli dep tanylsyn. 106-baptyń 2-bóliginiń 3, 5, 11-tarmaqtary boıynsha 9 jylǵa, 110-baptyń 2-bóliginiń 1, 2-tarmaqtary boıynsha 6 jylǵa, 190-baptyń 3-bóliginiń 1-tarmaǵy boıynsha 5 jylǵa bas bostandyǵynan aıyrý jazasy taǵaıyndalsyn. Qazaqstan Respýblıkasy Qylmystyq kodeksiniń 58-baby 3-bóligi negizinde jazalardy ishinara qosý arqyly túpkilikti 12 jyl merzimge bas bostandyǵynan aıyrý jazasy belgilensin. Jazasyn qylmystyq-atqarý júıesiniń ortasha qaýipsizdik mekemesinde ótesin. Isabaeva Álııa ıAkovlevna Qazaqstan Respýblıkasy Qylmystyq kodeksiniń 106-baby 2-bóliginiń 3, 5, 11-tarmaqtary men 110-baby 2-bóliginiń 1, 2-tarmaqtarynda kózdelgen quqyq buzýshylyqtardy jasaǵany úshin kináli dep tanylsyn. 106-bap boıynsha 8 jylǵa, 110-bap boıynsha 5 jylǵa bas bostandyǵynan aıyrý jazasy taǵaıyndalsyn. Qazaqstan Respýblıkasy Qylmystyq kodeksiniń 58-baby 3-bóligine sáıkes jazalardy ishinara qosý arqyly túpkilikti 10 jyl merzimge bas bostandyǵynan aıyrý jazasy belgilensin. Isabaeva Naýraıym Aıanqyzy Qazaqstan Respýblıkasy Qylmystyq kodeksiniń 110-baby 2-bóliginiń 1, 2-tarmaqtarynda kózdelgen qylmystyq quqyq buzýshylyqty jasaǵany úshin kináli dep tanylyp, oǵan 4 jyl 8 aı merzimge bas bostandyǵynan aıyrý jazasy taǵaıyndalsyn, — dep úkimdi jarııalady sýdıa.
Budan bólek, sot árbir jábirlenýshiniń paıdasyna moraldyq zııandy óteý týraly talapty qanaǵattandyryp, 10 mıllıon teńgeden óndirip berý jóninde sheshim shyǵardy.
Úkim ázirge zańdy kúshine engen joq. Qorǵaýshy tarap apellıatsııalyq shaǵym túsirýge nıetti.
