Qaraǵandyda ARTEL brendti turmystyq tehnıka óndiriledi

Qaraǵandy oblysynda jylyna 1,1 mln dana turmystyq tehnıka shyǵaratyn zaýyt iske qosylmaqshy. Bul týraly Úkimet otyrysynda Ónerkásip jáne qurylys mınıstri Qanat Sharlapaev málim etti, dep habarlaıdy QazAqparat tilshisi.

«Qaraǵandy oblysynda ónimdiligi jylyna 1,1 mln dana turmystyq tehnıka óndirisin («Silk Road Electronics» JShS) iske qosý josparlanýda. Zaýytta ARTEL brendimen teledıdarlar, sý jylytqyshtary, shańsorǵyshtar, shaǵyn peshter, kir jýǵysh mashınalar jasalady, 530 jańa jumys orny qurylady. Sondaı-aq, 261 jańa jumys orny bar koks shyǵaratyn zamanaýı zaýyt iske qosylady. Qýaty jylyna 400 myń tonna arnaıy koks óndirýge qaýqarly», - dedi ol.

Bul ónimniń bir bóligi keıinnen eksportqa shyǵarylmaq. Al negizgi tutynýshysy ERG kásiporyndary bolmaq.

«Qostanaı oblysynda «SaryarqaAvtoProm» kompanııasy Chevrolet Onix avtomobılderin shaǵyn toraptyq ádispen (CKD) óndirýdi josparlap otyr. Jylyna 30 myń danasyn shyǵarý josparlanýda. Bul ishki suranysty qamtamasyz etýge jáne 400 jumys ornyn qurýǵa múmkindik beredi», - dedi vedomstvo basshysy.