Qaraǵandyda apattyq elektr jelileri anyqtalyp, «Shet-Energo» múlki memleketke ótti
QARAǴANDY. KAZINFORM — Shet aýdanyndaǵy elektr júıesiniń apattyq jaǵdaıy resmı tekseris barysynda anyqtaldy. Mamandar «Shet-Energo» kompanııasynyń qyzmetinde 448 zańbuzýshylyqty tirkedi.
23 jyldan astam ýaqyt boıy Qaraǵandy oblysy Shet aýdanynyń elektr jelilerin jeke menshik «Shet-Energo» kompanııasy basqaryp kelgen. Alaıda bul kezeńde ınfraqurylymdy jańǵyrtýǵa ınvestıtsııa quıylmaǵan. Nátıjesinde jelilerdiń tozý deńgeıi 90 paıyzdan asyp, apattardyń sany jyldan jylǵa artqan.
2024 jyly 324 jeli apaty oryn alsa, bıylǵy jyldyń basynan beri 256 jaǵdaı tirkelgen. Aqpan aıynda elektr qýatynyń ajyraýyna baılanysty aýdanda jergilikti aýqymdaǵy tótenshe jaǵdaı rejımi engizilgen bolatyn.
Energetıkalyq daǵdarys 12,5 myń turǵynǵa, sharýashylyqtarǵa, kásipkerlerge jáne áleýmettik nysandarǵa zardabyn tıgizdi.
Tekserý barysynda kompanııa elektrmen jabdyqtaý shemasyn jobalyq qujattarǵa qaıshy túrde ózgertkeni anyqtaldy. Qoldanystaǵy 14 joǵary voltty qosalqy stantsııanyń ornyna nebári 5-eýi ǵana jumys istep kelgen.
Batyq, Aqoı, Krasnaıa Polıana, Pıket jáne Qarmys aýyldaryndaǵy qosalqy stantsııalar túgel alynyp tastalyp, olardyń ornyna zań talaptaryn elemeı jasalǵan taratý pýnktteri ornatylǵan.
115 transformatorlyq qosalqy stantsııadan tek 39-y ǵana saqtalyp, olar shamadan tys júktememen jumys istegen. Bul kerneýdiń turaqty túrde tómendeýine sebep bolǵan. Sondaı-aq kásiporynnyń jóndeý jáne profılaktıkalyq jumystar júrgizetin tehnıkalyq bazasy da bolmaǵan.
Qaraǵandy oblysy boıynsha Atomdyq jáne energetıkalyq qadaǵalaý men baqylaý komıteti «Shet-Energo» qyzmetiniń zańǵa sáıkes kelmeıtinin málimdedi. Kompanııa elektr energııasyn tasymaldaýshy jáne taratýshy uıymdarǵa qoıylatyn talaptardy oryndamaǵan, halyq pen áleýmettik nysandardy senimdi jaryqpen qamtamasyz etpegen.
Qazirgi tańda «Shet-Energo» JShS-niń barlyq múlki men jer ýchaskeleri aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimine berildi. Táýelsiz baǵalaý nátıjesi boıynsha burynǵy menshik ıesine ótemaqy tólendi.
Aýdan ákimdigi júıeni qalpyna keltirý boıynsha aýqymdy jumys bastady. 23 jańa transformatorlyq qosalqy stantsııa satyp alynyp, 30 ajyratqysh pen 11 transformator aýystyryldy, bir shaqyrymnan astam sym men ondaǵan tirek jańartyldy. Jóndeý jumystary tolyq tártip ornaǵanǵa deıin jalǵasady.
Osyǵan deıin «Shet-Energo» jaýapkershiligi shekteýli seriktestiginiń aınalasyndaǵy júıesiz jumystan 17 eldi mekenniń turǵyndary zardap shegip otyrǵany jaıly jazǵan bolatynbyz.