Qaraǵandyda antıbıotık ekken soń er adam kóz jumdy

Qaraǵandy oblystyq klınıkalyq aýrýhanasynda 40 jastaǵy er adam anafılaktıkalyq shoktan qaıtys boldy. Onyń antıbıotıkke allergııasy bolǵany anyqtaldy. Josparly operatsııa aldynda naýqasqa medbıke tamyr arqyly tseftrıakson dárisin engizip, sodan kóz jumǵan, dep habarlaıdy Kazinform agenttiginiń tilshisi.

Qaıǵyly oqıǵa 8 qarashada bolǵan. 40 jastaǵy Tórejan Maqashevke josparly ota jasaý kerek edi.

Oblystyq klınıkalyq aýrýhana anafılaktıkalyq shoktan josparly em alý kezinde naýqas kóz jumǵanyn rastaıdy.

"Naýqasqa operatsııa kezinde yqtımal asqynýlardy boldyrmaý úshin profılaktıkalyq maqsatta Tseftrıakson preparaty taǵaıyndaldy. Naýqastyń "Tseftrıakson" preparatyna allergııasy bar ekendigi týraly aıtylǵanyn eskere otyryp, klınıka dárigerleri allergologııalyq jáne ımmýnologııalyq kómek kórsetý standartynyń talaptaryna sáıkes ony engizer aldynda teriishilik allergııalyq synaq taǵaıyndady, ol teris nátıje kórsetti. Naýqastyń ambýlatorııalyq kartasynda allergııalyq reaktsııanyń bolýy týraly derekter bolǵan joq", - dep habarlady Oblystyq klınıkalyq aýrýhanada.

"Tseftrıakson" preparatyn kóktamyr arqyly engizgennen keıin er adamda anafılaktıkalyq reaktsııa paıda bolǵan.

"Reanımatsııa dárigerleriniń barlyq kúsh-jigerine qaramastan, naýqas qaıtys boldy. Oblystyq klınıkalyq aýrýhananyń Densaýlyq saqtaý salasyndaǵy NQA talaptaryna sáıkes dárilik preparatty qoldanýdyń jaǵymsyz saldary týraly Ulttyq dárilik zattar men medıtsınalyq buıymdardy saraptaý ortalyǵyna habarlama, Medıtsınalyq jáne farmatsevtıkalyq baqylaý departamentine josparly emdeýge jatqyzý kezinde ólim týraly shuǵyl habarlama jiberildi", - dep tolyqtyrdy Qaraǵandy oblystyq klınıkalyq aýrýhanasynda.

Atalmysh fakti boıynsha qylmystyq is qozǵaldy. Qazirgi ýaqytta Qaraǵandy oblysy boıynsha Medıtsınalyq jáne farmatsevtıkalyq qyzmet sapasyn baqylaý komıteti jospardan tys tekserý júrgizýde.

Tekserý nátıjeleri boıynsha sharalar qabyldanady.