Qaraǵandyda alty balaǵa jasalǵan qorlyq: prokýror 12 jylǵa deıin jaza surady

Qaraǵandy oblysynyń kámeletke tolmaǵandar isteri jónindegi mamandandyrylǵan aýdanaralyq sotynda alty balany patronattyq tárbıesine alǵan erli-zaıyptylar men olardyń kámeletke tolǵan qyzyna qatysty is qaralyp jatyr. Іs buǵan deıin qosymsha tergeýge qaıtarylǵan bolatyn.

Tergeý nusqasyna sáıkes, Qarqaraly aýdanyndaǵy pedagogter otbasy balalar úıinen alynǵan balalardy bes jyl boıy júıeli túrde qorlaǵan. Olarǵa aýyr sharýashylyq jumystaryn istetip, mal baqtyrǵan, uryp-soǵyp, ash ustap, qorlyq kórsetkeni aıtyldy.

Tergeý málimetinshe, patronattyq tárbıedegi balalardy bolmashy tentektigi úshin uryp-soǵyp, tezek aralasqan nan jeýge jáne ıttiń úıshiginde uıyqtaýǵa májbúrlegen. Sondaı-aq sotta balalardyń ústine qaınaǵan sý quıylyp, qyzǵan temir kóseýmen kúıdirilgeni de aıtyldy.

Dárigerler balalardyń biriniń denesinen 19 tyrtyq, al ekinshisinen 47 tyrtyq anyqtaǵan. Zardap shekkenderdiń biri buǵan deıin sotta ózin kilemge orap, ústinen sekirgenin, sodan esinen tanyp qalǵanyn aıtqan edi. Osydan keıin balaǵa basyna birneshe ota jasalyp, keıin múgedektik rásimdelgen.

Qazirgi jaryssóz barysynda talqylanǵan máselelerdiń biri — balalardyń biriniń patronattyq otbasyǵa berilgenge deıingi densaýlyq jaǵdaıy boldy.

Jaryssóz barysynda prokýror jábirlenýshi balalardyń aıǵaqtaryna kúmán keltirýge negiz joq ekenin aıtyp, olar keshendi sot-psıhologııalyq saraptamamen rastalǵanyn jetkizdi.

— Sarapshylardyń qorytyndysyna sáıkes, kámeletke tolmaǵan bala buǵan deıin qandaı da bir psıhologııalyq aýytqýlarǵa shaldyqpaǵan, jaǵdaıdy durys qabyldap, ózine qatysty jasalǵan áreketterdiń mánin túsine alǵan. Al bolǵan oqıǵalardan keıin onyń psıhıkalyq aýytqýy paıda bolǵan, — dedi prokýror sotta.

Alaıda kýágerlerdiń biri balalardyń patronattyq otbasyna berilgenge deıin densaýlyǵynda aqaý bolǵanyn málimdedi.

— Bastapqydan-aq balanyń syrqat ekeni baıqaldy. Ol óte tuıyq boldy, eshkimmen sóılespeıtin jáne únemi temirjol jaqqa qashyp ketetin. Anasy onyń bala kezinen aýyratynyn aıtyp, aýrýhanalarǵa aparyp júrgenin aıtqan, — dedi kýáger.

Al jábirlenýshilerdiń ókili bul pikirmen kelispeı, medıtsınalyq qujattarda balalardyń densaýlyǵy qalypty bolǵanyn alǵa tartty.

— Medıtsınalyq kitapshada basqa balanyń tegi kórsetilgen, al jazbalardyń basym bóliginde balanyń saý ekeni jazylǵan. Tek jekelegen belgiler basqa qalammen jáne basqa túspen toltyrylǵan. Sondaı-aq shyǵý tegi túsiniksiz japsyrylǵan jazba da bar, — dedi jábirlenýshilerdiń ókili.

Sonymen qatar sotta otbasynyń aýylǵa kóshýine qatysty jańa jaıttar belgili boldy. Sot otyrysynda aıtylǵandaı, otbasy ákimniń ótinishimen qonys aýdarǵan, alaıda otaǵasy jergilikti mektepke dırektor etip taǵaıyndaýdy shart retinde qoıǵan. Oqıǵa bolǵan kezeńde er adam aýyl mektebin basqarǵany belgili boldy.

Memlekettik aıyptaýshy sottalýshy er adamǵa 12 jyl, onyń jubaıyna 10 jyl, al qyzyna 4 jyl 8 aı bas bostandyǵynan aıyrý jazasyn taǵaıyndaýdy surady. Sondaı-aq árbir balaǵa 10 mıllıon teńgeden moraldyq ótemaqy óndirýdi talap etti.

Budan buryn Qazaqstanda zorlyq-zombylyqtan zardap shekken balalarǵa arnalǵan kómek kabınetteri ashylatynyn jazǵanbyz.