Qaraǵandyda áleýmettik taýarǵa baǵany negizsiz kótergen 37 kásipker jazalandy
QARAǴANDY. KAZINFORM — Qaraǵandyda áleýmettik taýarǵa saýda ústemesin negizsiz kótergen 5 saýda jelisi men 32 kóterme jetkizýshi jazalandy. Bul týraly Saýda jáne ıntegratsııa mınıstrligi habarlady.
— Qaraǵandy oblysyna kóterme taýar jetkizýshiler Milk Group JShS jáne Dep Plıýs JShS sary maıdyń saýda ústemesin 22,6% jáne 26,3%-ǵa asyrǵan. Al Sultan Kamal JShS maılylyǵy 2,5% aırandy 43,2% saýda ústemesimen, Kadomets JK 1-sanattaǵy taýyq jumyrtqasyn 25% saýda ústemesimen satqan. Al Er-Aı 2012 JShS qaraqumyq jarmasyna belgilengen saýda ústemesin saýda ústemesin 12 paıyzǵa arttyryp jibergen. Óńirge kókónis ónimderin jetkizýshiler JK Nadırov jáne JK Marsh saýda jelilerine kartopty satqanda saýda ústemesin 5% jáne 20%-ǵa asyrǵan, — delingen mınıstrlik habarlamasynda.
Nátıjesinde Saýda jáne ıntegratsııa mınıstrliginiń Qaraǵandy oblysy boıynsha saýda jáne tutynýshylardyń quqyǵyn qorǵaý departamenti barlyq saýda sýbektisin ÁQBtK 204-4-baby boıynsha ákimshilik jaýapkershilikke tartty.
Jalpy Qaraǵandy oblysynda memlekettik baqylaý sheńberinde jyl basynan beri 155 saýda sýbektisi ákimshilik jaýapkershilikke tartyldy. Olardyń 142-si áleýmettik mańyzy bar azyq-túlik taýarlary boıynsha saýda ústemesin negizsiz asyrǵan, 10 sýbektide baǵa kórsetkishteriniń sáıkes bolmaýy faktileri anyqtalǵan, 3 sýbekt saýda obektileriniń jumys reglamentin saqtamaǵan. Jalpy alǵanda 40 kásipkerge eskertý berildi, al 115 kásipkerge 5,0 mln teńgeden astam kólemde aıyppul salyndy.
Áleýmettik mańyzy bar azyq-túlik taýarlarynyń baǵasynyń negizsiz ósýine jol bermeý jáne ónimsiz deldaldyq tizbekterdi boldyrmaý maqsatynda oblysta deldaldyq shemalardy tergep-tekserý jónindegi óńirlik komıssııa jumys isteıdi. Komıssııa algorıtmine sáıkes saýda departamenti basqa memlekettik organdarmen tyǵyz ózara is-qımyl jasaıdy.
— Baǵanyń negizsiz ósýin anyqtaý úshin Memlekettik kirister departamentimen birlesip negizgi naryq sýbektileriniń elektrondyq shot-faktýralaryn turaqty túrde taldaý júrgizemiz jáne birlesken jumys aıasynda óndirýshiden sýpermarket sóresine deıingi taýar qozǵalysy turaqty baqylaýda ustaımyz, — dedi Qaraǵandy oblysy boıynsha saýda jáne tutynýshylardyń quqyǵyn qorǵaý departamentiniń basshysy Abzal Rahymbaev.
Jyl basynan beri komıssııanyń 57 otyrysy ótkizildi. Nátıjesinde 5 iri saýda jelisi jáne 32 kóterme jetkizýshi ákimshilik jaýapkershilikke tartyldy. Departament monıtorıngi boıynsha, qaraǵandylyq kásipkerler áleýmettik mańyzy bar taýarlar ishinen eń kóp bakaleıa ónimderine saýda ústemesin negizsiz arttyrady. Deparatment bul ónimder boıynsha jyl basynan beri 81 fakt anyqtady. Odan keıin eń kóp kókónis ónimderine saýda ústemesin negizsiz qosqan (51 fakt).
Aıta ketelik aldaǵy merekeler qarsańynda bazarlarda baǵa baqylaýy kúsheıtiledi.