Qaraǵandyda aǵash butaǵy qulap, 5 jastaǵy bala qaza tapty
QARAǴANDY. KAZINFORM — Qaraǵandyda qatty jel kezinde aǵashtyń butaǵy qulap, bes jasar bala kóz jumdy. Oqıǵa ornyna kelgen dárigerler balany ólim aýzynan arashalap qala almady.
Qaıǵyly jaǵdaı Álıhan Bókeıhan aýdanynda bolǵan. Aldyn ala málimet boıynsha, aǵash kondomınıým aýmaǵynda, turǵyn úıdiń kireberisine jaqyn jerde ornalasqan.
Qaraǵandy oblysynyń Polıtsııa departamenti atalǵan fakti boıynsha qylmystyq is qozǵalǵanyn habarlady.
— Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan tergeý amaldary júrgizilip jatyr, — dep málimdedi Qaraǵandy oblysy PD baspasóz qyzmeti.
Aldyn ala málimetke sáıkes, oqıǵa kezinde jeldiń ekpini sekýndyna 18 metrge deıin jetken. Medıtsına qyzmetkerleri balaǵa qajetti kómek kórsetýge tyrysqanymen, onyń ómirin saqtap qalý múmkin bolmady.
Qaıǵyly oqıǵaǵa baılanysty qala turǵyndaryna qatty jel kezinde barynsha saq bolý eskertildi. Mundaı kezde qýraǵan jáne eski aǵashtardyń, jaıqalyp ósken butaqtardyń, jarnamalyq qurylymdardyń, elektr berý jelileriniń jáne ornyqtylyǵy tómen basqa da nysandardyń mańyna barmaǵan jón.
Mamandar ata-analarǵa kishkentaı balalardy dalada qaraýsyz qaldyrmaýǵa keńes beredi. Sondaı-aq avtokólikterdi múmkindiginshe aǵashtardan jáne berik bekitilmegen qurylymdardan alys jerge qoıǵan durys.
Aýa raıy kúrt buzylǵan jaǵdaıda ashyq jerde qalmaı, múmkindiginshe tez arada ǵımarattyń ishin panalaý qajet.
Qazirgi ýaqytta tergeý amaldary jalǵasyp jatyr. Quqyq qorǵaý organdary qaıǵyly oqıǵanyń barlyq mán-jaıyn anyqtaıdy.
Eske salsaq, buǵan deıin Almatyda Baým toǵaıynda ústine qýraǵan aǵash qulap, aýyr jaraqat alǵan 19 jastaǵy qyz kóz jumǵany habarlanǵan bolatyn.
