Qaraǵandyda adamdardy qaıyr suraýǵa májbúrleý boıynsha sottalǵandardyń jazasy ózgerdi

QARAǴANDY. KAZINFORM – Qaraǵandy oblystyq soty múgedek azamattardy júıeli túrde qanady dep aıyptalǵan topqa qatysty qylmystyq isti qaıta qarady. Apellıatsııalyq alqa tergeý organdary uıymdasqan qylmystyq toptyń baryn dáleldeı almaǵanyn atap, aıyptyń bir bóligin alyp tastady jáne tórt sottalýshynyń bárine shyǵarylǵan bastapqy úkimdi edáýir jeńildetti.

Oblystyq sot múgedekterdi qaıyr suraýǵa májbúrlegen qylmystyq topqa qatysty iske núkte qoıdy. Alqa tergeý materıaldaryn saralaı kele, QK-tiń 262-baby («uıymdasqan qylmystyq top qurý, basqarý jáne onyń áreketine qatysý») boıynsha taǵylǵan aıyptaýlardy dálelsiz dep tanydy. Sonyń nátıjesinde barlyq tórt sottalýshy bul bap boıynsha tolyq aqtaldy.

Atalǵan is boıynsha tórt adam sottaldy. Tergeý málimetinshe, olardyń biri qylmystyq top qurdy dep, qalǵandary onyń quramynda boldy dep aıyptalǵan edi. Sondaı-aq qylmyskerlerge dármensiz kúıdegi eki azamatty júıeli túrde qanady, kúsh kórsetip ustap otyrdy degen aıyp taǵylǵan.

2025 jylǵy 26 mamyrda mamandandyrylǵan aýdanaralyq sot alǵashqy úkim shyǵaryp, boljaldy uıymdastyrýshyny 17 jylǵa, basqa úsh adamdy 12 jyldan bas bostandyǵynan aıyrǵan bolatyn. 

Alaıda apellıatsııalyq alqa sottalǵandar men olardyń qorǵaýshylarynyń shaǵymdaryn zerdeleı kele, tergeýdiń birqatar qorytyndysyn negizsiz dep tapty. «Uıymdasqan qylmystyq toptyń bar ekenine jetkilikti dálel usynylmaǵan» dep kórsetip, aıyptaýdyń osy bóligin joıdy.

Sonymen birge sot qalǵan aıyptardy qaıta saralap, olardy dármensiz adamdardy qanaýǵa qatysty basqa baptar boıynsha túzetti. Nátıjesinde basty sottalýshyǵa 11 jyl túpkilikti jaza taǵaıyndaldy. Ol jazasyn qatań rejımdegi mekemede óteıtin boldy.

Qalǵan úsh adamǵa alty jyldan bas bostandyǵynan aıyrý jazasy bekitildi. Olar ortasha qaýipsizdik deńgeıindegi túzeý mekemelerinde jazasyn óteıdi.

Sot jábirlenýshilerge ótemaqy tóleý qorynyń paıdasyna óndiriletin somany da qaıta qarap, 110 760 teńgeden 73 840 teńgege deıin qysqartty. Buǵan qosa, basty aıyptalýshyǵa belgilengen májbúrli tólem tolyǵymen kúshin joıdy.

Apellıatsııalyq alqa tergeý barysynda qylmystyq-protsessýaldyq zańnamanyń buzylǵanyn anyqtap, polıtsııa men prokýratýraǵa jeke qaýly shyǵardy.

Osylaısha, birinshi ınstantsııanyń úkimi ózgertilgen nusqada zańdy kúshine endi.