Qaraǵandyda kásipker adam ólimine ákelgen jol apaty úshin sottaldy
QARAǴANDY. KAZINFORM — Qaraǵandyda jol-kólik oqıǵasy saldarynan adamnyń qaza bolýyna baılanysty sot úkimi shyqty.
Kásipker Sergeı Kamaev jol qozǵalysy erejesin buzyp, abaısyzda ólimge sebepker bolǵany úshin kináli dep tanylyp, 2 jyl 6 aıǵa bas bostandyǵynan aıyryldy. Sonymen qatar ol 5 jylǵa kólik júrgizý quqyǵynan aıyryldy.
Sot otyrysynda sýdıa Jańylsyn Shamuratova aıyptalýshynyń kinásin moıyndaǵanyn, buryn sottalmaǵanyn jáne Aýǵan soǵysy ardageri ekenin eskerdi. Osyǵan baılanysty jazanyń eń joǵarǵy sheginen tómen jaza taǵaıyndaldy.
Aıyptalýshy 2024 jyldyń qyrkúıeginen beri qamaýda otyr. Zańnamaǵa sáıkes, tergeý ızolıatorynda ótkizgen árbir eki kúni bir kúnge teńestiriletindikten, onyń naqty óteıtin merzimi shamamen alty aıdy quraıdy.
Sot úkimi ázirge zańdy kúshine engen joq jáne apellıatsııalyq shaǵym túsirý múmkindigi bar.
Budan bólek, sot marqum Erlan Aldańǵarovtyń jubaıyna moraldyq jáne materıaldyq shyǵyndy óteý úshin 11 mıllıon teńge óndirip berýdi mindettedi. Buǵan deıin prokýratýra 13 mıllıon teńgeden astam ótemaqy talap etken edi.
Jábirlenýshi taraptyń advokaty Meıramǵalı Murzalıev úkimge kóńili tolmaıtynyn, bul sheshimge qatysty shaǵym joldaıtynyn jetkizdi. Onyń aıtýynsha, taǵaıyndalǵan jaza tym jeńil, al zań boıynsha eń joǵarǵy merzim — bes jylǵa deıin. Bul jaǵdaı jazadan jaltarýǵa bolady degen túsinik qalyptastyrýy múmkin deıdi ol. Sonymen birge, advokat sottyń keıbir zardap shekkenderdi jábirlenýshi dep tanýdan bas tartqanyn ádiletsiz sheshim dep baǵalady.
Osyǵan deıin Abaı oblysy Úrjar aýdany Besterek aýylyndaǵy jol apatyna qatysy bar júrgizýshi 2 aıǵa qamalǵany jaıly habarlaǵan bolatynbyz.