Qaraǵandyda adam aǵzasynan esirtkini anyqtaıtyn zamanaýı qurylǵy iske qosyldy
QARAǴANDY. KAZINFORM – Qaraǵandy oblystyq psıhıkalyq densaýlyq ortalyǵynda esirtki zattaryn dál anyqtaıtyn zamanaýı gazdyq hromatograf qoldanysqa engizildi. Bul qurylǵy birneshe kún buryn paıdalanylǵan psıhobelsendi zattardy da mıkrodozada anyqtaýǵa qabiletti.
Jańa qurylǵy kez kelgen bıologııalyq suıyqtyqtan tek dástúrli emes, sonymen qatar sıntetıkalyq preparattardy da joǵary dáldikpen anyqtaıdy. Qurylǵynyń bazasynda 2000-nan astam hımııalyq qosylys tirkelgen. Apparat jergilikti bıýdjet qarajatyna 180 mıllıon teńgege satyp alynyp, klınıkalyq tájirıbe kezinde óz tıimdiligin dáleldeı bastaǵan.
— Keıde ekspress-testter teris nátıje kórsetkenimen, patsıenttiń aǵzasynda naqty sıntetıkalyq psıhostımýlıator bolǵany belgili bolady. Jańa hromatograf muny dál kórsetti. Qurylǵynyń sezimtaldyǵy óte joǵary, — deıdi Qaraǵandy oblystyq psıhıkalyq densaýlyq ortalyǵy dırektorynyń strategııalyq damý jónindegi orynbasary Vasılıı Gabov.
Mamandardyń aıtýynsha, hromatograf medıtsınalyq saraptamalardyń sapasyn aıtarlyqtaı arttyrady. Ol esirtkige mas kúıde kólik tizgindegen júrgizýshilerdi anyqtaýda taptyrmas qural bolmaq. Endi tyıym salynǵan zattar ǵana emes, quramynda psıhobelsendi komponentteri bar dáriler de esepke alynady.
Sonymen qatar, qurylǵy ádiletsiz aıyptaýlardan da qorǵaı alady. Eger júrgizýshi dári iship nemese quramynda mak bar ónim tutynyp, testten qate nátıje alsa, hromatograf onyń kinásizdigin ǵylymı túrde dáleldeıdi.
Qural klınıkalyq dıagnostıkada da mańyzdy ról atqarady. Kóptegen naýqastar naqty qandaı zat qabyldaǵanyn bilmeıdi. Hromatograf dárigerlerge patsıenttiń jaǵdaıyn naqty baǵalap, tıimdi em taǵaıyndaýǵa kómektesedi.
— Buǵan deıin de ata-analar balalaryna kúmándanyp, olardy ortalyqqa ákeletin. Biz ekspress-test jasap, eshteńe anyqtamaı, tek syrttaı baqylaýmen shekteletinbiz. Endi biz naqty nátıjege súıene otyryp, der kezinde áreket ete alamyz, — deıdi Vasılıı Gabov.
Qazirgi tańda oblysta esirtkige táýeldi retinde tirkeýde turǵandardyń sany shamamen 8 myń adamdy quraıdy. Alaıda mamandar bul kórsetkishtiń tómendeýi shynymen de nashaqorlardyń azaıǵanyn bildirmeıtinin aıtady.
— Statıstıkanyń tómendeý keıbir naýqastardyń anonımdi túrde emdelýine baılanysty», — dep túsindirdi ortalyq mamandary.
Sondaı-aq, jol-kólik qaýipsizdigi turǵysynan alǵanda, esirtki nemese alkogoldik mas kúıde kólik júrgizetinder azaımaı otyr. Sarapshylardyń pikirinshe, jańa qurylǵy quqyqtyq jáne medıtsınalyq salada bul máselemen kúreste mańyzdy quralǵa aınalady.
Osyǵan deıin ІІM nashaqorlar tutynatyn dárihanadaǵy preparattar satylymyn baqylaýǵa alý kerektigin alǵa tartqan edi.