Qaraǵandyda 7 gektar jer órtenip, qalaǵa tútin jaıyldy
QARAǴANDY. KAZINFORM — Qaraǵandy oblysynda aptap ystyq pen qýańshylyqqa baılanysty tabıǵı órt qaýpi seıilmeı tur. Qaraǵandyda qurǵaq shóp tutanyp, sonyń saldarynan qalanyń keı bóliginde tútin ıisi sezilgen. Órt ornyna qutqarýshylar jiberilip, ony sóndirýge jergilikti atqarýshy organdardyń kúshi men tehnıkasy da tartyldy.
Oblystyq tótenshe jaǵdaılar departamentiniń málimetinshe, Álıhan Bókeıhan aýdanyndaǵy «Vostok» shaǵynaýdanynyń Sahalın ýchaskesinde butalar men qurǵaq shóp órtengen. Aldyn ala málimet boıynsha, órt shamamen 7 gektar aýmaqqa taraǵan.
— Qazirgi ýaqytta órtti oqshaýlaý jáne tolyq sóndirý jumystary júrgizilip jatyr. Tilsiz jaýmen kúreske 35 maman men 8 tehnıka jumyldyrylǵan. Qutqarýshylar turǵyndardy sabyr saqtaýǵa shaqyrady, — delingen departamenttiń baspasóz qyzmeti taratqan habarlamada.
Jeldiń baǵytyna qaraı tútin ıisi qalanyń ár bóliginde sezilip tur. Mamandar oqıǵa ornynda jumys istep, órtti aýyzdyqtaý úshin qajetti sharalardy qabyldap jatqanyn málimdedi.
TJD qyzmetkerleri tabıǵat aıasynda demalǵan kezde órt qaýipsizdigi talaptaryn saqtaýdyń mańyzdylyǵyn eske salady. Ashyq jerde sóndirilmegen otty, temeki tuqylyn jáne basqa da ot kózderin qaldyrmaý qajet.
Buǵan deıin Qaraǵandy oblysynda birneshe aýdanda dala órti paıda bolyp, saldarynan eki adamdy kúıik shalǵany habarlanǵan bolatyn.
Sońyra Qarqaraly aýdanyndaǵy órtti sóndirýge tikushaq jumyldyrylǵany málimdeldi.
