Qaraǵandyda 58 myń turǵyn jylý aqysyn joǵary tarıfpen tólep kelgen
ASTANA. KAZINFORM — Prokýratýra 100 mıllıon teńgege baǵalanǵan 58 myń tutynýshynyń quqyǵyn qorǵady. Qaraǵandy oblysy prokýratýrasy málim etti.
Qaraǵandy qalasy Qazybek bı aýdanynyń prokýratýrasy tabıǵı monopolııalar salasyndaǵy zańnamanyń saqtalýyna taldaý júrgizdi.
— «Tabıǵı monopolııalar týraly» Zańynyń 26-baby 2-tarmaǵynyń 11) tarmaqshasyna sáıkes, tabıǵı monopolııa sýbektisi syrttaǵy aýanyń naqty temperatýrasyn eskere otyryp, jylý energııasyn ótkizý boıynsha rettelip kórsetiletin qyzmettiń qunyn tutynýshylarǵa tikeleı ne tutynýshynyń turǵan jerin anyqtaý múmkin bolmaǵan jaǵdaıda, jylý energııasyn ótkizý boıynsha rettelip kórsetiletin qyzmetke aqy tóleý kezinde tarıfti tómendetý arqyly qaıta esepteýdi júrgizýge mindetti, — delingen habarlamada.
Qadaǵalaý qyzmetiniń nátıjeleri boıynsha JShS «Teplotranzıt» 2024-2025 jyldardaǵy jylytý kezeńindegi syrtqy aýanyń naqty temperatýrasyn eskere otyryp, jylýmen jabdyqtaý qyzmetteriniń qunyn qaıta esepteý boıynsha mindettemelerdi oryndamaǵany anyqtaldy.
Prokýrorlyq qadaǵalaý aktisin qaraý qorytyndysy boıynsha Seriktestik 58 myńnan astam tutynýshynyń qarajatyn jalpy somasy 100 mıllıon teńgege qaıta eseptedi.
Prokýratýra organdary azamattardyń quqyqtary men zańdy múddelerin qorǵaýdy qamtamasyz ete otyryp, zańnamanyń saqtalýyn únemi baqylaıdy.
Buǵan deıin Talǵarda 33 kásipker elektr energııasyn joǵary tarıfpen tólep kelgeni anyqtalǵan edi.
