Qaraǵandyda 500 maman beıimdelgen sport baǵytyn meńgeredi
QARAǴANDY. KAZINFORM — Erekshe bilim berý qajettilikteri bar balalar úshin sporttyq orta qoljetimdi bola túsýde. Óńirde mamandar daıarlaý, arnaıy sektsııalar ashý jáne áleýmettik beıimdelý múmkindikterin keńeıtý baǵytyndaǵy jumystar qatar júrgizilýde.
Qaraǵandy oblysynda jyl sońyna deıin 500-ge jýyq dene shynyqtyrý pániniń muǵalimi beıimdelgen dene shynyqtyrý negizderi men erekshe bilim berý qajettilikteri bar balalarmen jumys isteý ádistemesi boıynsha arnaıy oqytýdan ótedi. Nátıjesinde óńirdegi árbir mektepte osy baǵytta daıyndyqtan ótken keminde bir maman jumys isteıtin bolady.
Bul bastama ınklıýzıvti bilim berýdi júıeli damytýǵa baǵyttalǵan jumystardyń jalǵasy sanalady. Qaraǵandy oblysynyń ákimi Ermaǵanbet Bólekpaev múgedektigi bar balalardyń ata-analarymen turaqty túrde kezdesip, salalyq vedomstvolarmen birge olardyń ózekti máselelerin talqylap, sheshý joldaryn qarastyryp keledi.
Jańa oqý jylynan bastap beıimdelgen dene shynyqtyrý páni Qaraǵandy qalasyndaǵy eki kolledjdiń bilim berý baǵdarlamasyna engiziledi. Bul bolashaq dene shynyqtyrý muǵalimderine oqý barysynda qajetti teorııalyq bilim men praktıkalyq daǵdylardy meńgerýge múmkindik beredi.
Sonymen qatar múgedektigi bar jasóspirimderdiń qoǵamǵa beıimdelý múmkindikteri artyp keledi. Byltyr «Jasyl el» eńbek jasaqtarynyń pılottyq jobasyna 10 adam qatyssa, bıyl bul kórsetkish 50 adamǵa deıin ósti.
Qazir Qaraǵandy qalasynda «Áset Inklıýzıv» qoǵamdyq birlestigi janyndaǵy «Bizben birge bol» ıntegratsııalyq ortalyǵynyń bazasynda ınklıýzıvti eńbek jasaqtary jumys istep jatyr. Oblys ákimi bul jobany jyl boıy júzege asyrý múmkindigin qarastyrýdy tapsyrdy.
Batyl Jureg qoǵamdyq qorynyń teń quryltaıshysy Gaýhar Ákijanovanyń aıtýynsha, oblys ákimimen ótetin kezdesýler erekshe qajettilikteri bar balalar men olardyń otbasylary úshin mańyzdy máselelerdi sheshýge yqpal etedi.
— Bul tek bir balanyń nemese bir qalanyń máselesi emes. Biz ortaq túıtkilderdi talqylap, salalyq vedomstvolarmen birlesip sheshim qabyldaýǵa tyrysamyz. Aýdandar men qalalardyń ózderi bastama kóterip, erekshe qajettilikteri bar balalarǵa arnalǵan sport baǵyttaryn damytýǵa qyzyǵýshylyq tanytyp otyrǵany qýantady. Kóptegen usynystarymyz qoldaý taýyp jatyr, — dedi ol.
Óńirde beıimdelgen sport túrlerin damytý jumystary jalǵasýda. Bıyl Osakarov jáne Buqar jyraý aýdandarynda jeńil atletıka sektsııalary ashyldy. Sondaı-aq Saran qalasynda, onyń ishinde júzý baǵyty boıynsha sporttyq toptardyń jumysy jalǵasyp keledi.
Budan bólek, mentaldyq buzylystary bar balalarǵa arnalǵan beıimdelgen júzý baǵdarlamalary keńeıtilip, jeńil atletıka sektsııalaryndaǵy oryn sany kóbeıtildi.
Mańyzdy bastamalardyń biri — Qaraǵandy joǵary gýmanıtarlyq kolledji bazasynda damý erekshelikteri bar balalarǵa arnalǵan jazǵy lagerdiń uıymdastyrylýy. Alǵashqy maýsym ata-analar tarapynan oń baǵalanyp, bolashaq mamandar úshin tájirıbe jınaqtaıtyn tıimdi alańǵa aınaldy.
Sondaı-aq buǵan deıin ótken kezdesýlerdiń biriniń nátıjesinde Temirtaýda múgedektigi bar balalarǵa qoǵamdyq kólikte tegin júrý múmkindigi engizildi.
— Jyl saıyn ońaltýǵa, arnaıy baǵdarlamalarǵa jáne qoljetimdi sporttyq sabaqtarǵa muqtaj balalar sany artyp kele jatqanyn kórip otyrmyz. Sondyqtan ınklıýzıvti ortany odan ári damytyp, sabaqtardyń sapasyn arttyrýǵa jáne osyndaı jobalardy qoldaýǵa basymdyq beremiz. Ata-analarmen ashyq dıalog naqty máselelerdi anyqtap, tıimdi sheshim qabyldaýǵa múmkindik beredi, — dedi Ermaǵanbet Bólekpaev.
