Qaraǵandyda 40 bas jylqyny satpaq bolǵan 2 adam qolǵa tústi
QARAǴANDY. KAZINFORM – 2 qarasha kúni tańǵy saǵat 04:00 shamasynda Qaraǵandy qalasyna kire beriste ornalasqan bekette turǵan polıtsııa qyzmekterleri 57 jastaǵy azamattyń basqarýyndaǵy KamAZ avtokóligin toqtatty. Kólik ishinde júrgizýshimen qosa 57 jastaǵy azamat jáne onyń 29 jastaǵy uly bolǵan. Al kólikten 40 bas jylqy anyqtaldy.
Polisia.kz-tiń málimetinshe, tekseris kezinde jylqylardyń 57 jastaǵy azamatqa tıesili ekenin anyqtaıtyn qujattary bolmaǵan. Olardyń jylqylardy Aqtoǵaı aýdanyna qarasty qystaqtardyń birinen qalaǵa satýǵa ákele jatqany belgili boldy.
Jylqylardyń naqty kimge tıesili ekenin anyqtaý maqsatynda kólik polıtsııa bólimine jetkizildi.
Krımınaldyq polıtsııa qyzmetkerleri jylqylardy sýretke túsirip, Aqtoǵaı aýdandyq polıtsııa bólimine joldap, keıin olar aýyl turǵyndary otyratyn WhatsApp chatqa taratqan. Sonyń nátıjesinde aýdan turǵyndarynyń jylqysyn baǵatyn baqtashy ózine tıesili eki jylqyny tanydy.
Qazirgi ýaqytta barlyq jylqy Úshtóbe aýylyndaǵy úılerdiń biriniń qorasyna túsirilip, ol jerge polıtsııa qyzmetkerleri kúzet qoıdy.
Atalǵan derek boıynsha qylmystyq is qozǵaldy. Tártip saqshylary qylmystyq istiń negizinde basqa da jábirlenýshilerdi jáne qylmysqa qatysty tulǵalardy anyqtaý boıynsha keshendi is-sharalardy júrgizip jatyr.