Qaraǵandyda 36 jastaǵy turǵyn 7 mln teńgeniń altynyn urlap, lombardqa ótkizgen

QARAǴANDY. KAZINFORM – Qaraǵandylyq polıtseıler altyn buıymdardy urlaǵan kúdiktini qolǵa túsirdi.

Qaraǵandy qalalyq Polıtsııa basqarmasyna qarasty Mıhaılov polıtsııa bóliminiń qyzmetkerlerimen júrgizilgen keshendi jedel izdestirý is-sharalary barysynda asa iri kólemde urlyq jasady degen kúdikpen 36 jastaǵy azamat anyqtalyp, ustaldy.

Kúdikti qaladaǵy jer úılerdiń biriniń terezesin syndyryp kirip, ishinen altyn buıymdar urlap áketken. Jábirlenýshige keltirilgen shyǵyn kólemi – 7 mıllıon teńge.

«Ustalǵan azamat tergeý barysynda jasaǵan qylmysy týraly moıyndaý kórsetpe belgilerin berip, altyndardy lombardqa ótkizgenin aıtty. Aıǵaq zattar qaladaǵy lomdardtardyń birinen tárkilenip alyndy. Atalǵan derek boıynsha qylmystyq is qozǵalyp, tergeý áreketteri júrgizilip jatyr», - delingen Qaraǵandy PD habarlamasynda.

Kúdiktige qatysty qamaýǵa alý bultartpaý sharasy qabyldandy.

«Mıhaılov polıtsııa bóliminiń krımınaldyq polıtsııa qyzmetkerleriniń jedeldigin, kásibıligin, olardyń qıynshylyqqa tap bolǵan azamattarǵa jáne olardyń jumysyna degen janashyrlyǵy men adaldyǵyn atap ótkim keledi. Olarǵa raqmet aıtamyn», - dedi jábirlenýshi.

Qaraǵandyda aǵa ýákiletti ókil jazasyn óteýshini azaptaǵany úshin sottalǵanyn jazǵan bolatynbyz.