35 jyrtqysh qusty zańsyz ustaǵan Qusbegilik federatsııanyń múshesine úkim shyqty
QARAǴANDY. KAZINFORM — Qaraǵandyda jergilikti turǵynǵa qatysty qylmystyq is qaraldy. Ol sırek kezdesetin ári joıylyp ketý qaýpi bar janýarlar túrlerine jatatyn 35 jyrtqysh qusty zańsyz satyp alyp, ustaǵan. Qazaqstannyń qusbegilik federatsııasynyń múshesi sırek kezdesetin jáne joıylyp ketý qaýpi bar janýarlar túrlerin zańsyz aınalymǵa engizgeni úshin kináli dep tanyldy.
Іsti Qaraǵandy qalasynyń Qazybek bı aýdandyq soty Qazaqstan Respýblıkasy Qylmystyq kodeksiniń 339-babynyń 1-bóligi boıynsha qarady.
Sot tergeýi barysynda anyqtalǵandaı, sottalýshy birneshe jyl boıy jyrtqysh qustarmen saıatshylyqqa qyzyǵýshylyq tanytqan. 2017 jyly ol Instagram áleýmettik jelisinde dástúrli ańshylyq týraly jarııalanymdar ornalastyratyn paraqsha ashqan. Sondaı-aq onda jyrtqysh qustardy ustaý, kútip-baptaý jáne emdeý týraly aqparat aıtyp otyrǵan.
2017 jyldan 2026 jylǵy 5 aqpanǵa deıingi kezeńde er adam qajetti ruqsat qujattary bolmaǵanyna qaramastan, anyqtalmaǵan tulǵalardan 35 jyrtqysh qusty zańsyz satyp alǵan.
Saraptama nátıjesinde 31-i ıtelgi, bireýi suńqar, ekeýi búrkit jáne bireýi qarshyǵa tárkilengeni anyqtaldy.
Sot otyrysy barysynda sottalýshy óz kinásin tolyq moıyndap, jasaǵan isine shyn júrekten ókinetinin bildirdi.
Memlekettik aıyptaý tarapy oǵan bir jylǵa bas bostandyǵyn shekteý jazasyn taǵaıyndaýdy, sondaı-aq úsh jyl merzimge sırek kezdesetin janýarlar túrlerine qatysty qyzmetpen aınalysýyna tyıym salýdy surady.
Al qorǵaý tarapy sottalýshyǵa raqymshylyq jasaý týraly aktiniń talaptaryn qoldanýdy ótindi.
Jaza taǵaıyndaý kezinde sot birqatar jeńildetetin mán-jaıdy eskerdi. Olardyń qatarynda kinásin tolyq moıyndaýy, shyn júrekten ókinýi jáne asyraýynda tórt kámeletke tolmaǵan balasynyń bolýy nazarǵa alynǵan. Sot jaýapkershilikti aýyrlatatyn mán-jaılardy anyqtaǵan joq.
Nátıjesinde er adamǵa bir jyl alty aı merzimge bas bostandyǵyn shekteý jazasy taǵaıyndaldy. Sonymen qatar oǵan bir jyl merzimge sırek kezdesetin jáne joıylyp ketý qaýpi bar janýarlar túrlerine, sondaı-aq paıdalanýǵa tyıym salynǵan janýarlarǵa qatysty qyzmetpen aınalysýǵa tyıym salyndy.
Sonymen birge sot aıyptalýshyǵa «Qazaqstan Respýblıkasynyń jańa Konstıtýtsııasyn qabyldaýǵa baılanysty raqymshylyq jasaý týraly» zańdy qoldandy. Osyǵan baılanysty er adam negizgi jaza túri — bas bostandyǵyn shekteýden bosatyldy.
Úkim ázirge zańdy kúshine engen joq.
Buǵan deıin Qazaqstannyń qusbegilik federatsııasynyń múshesi Qyzyl kitapqa engizilgen qustarǵa arnalǵan zańsyz tálimbaq uıymdastyrǵany habarlanǵan bolatyn.
