Qaraǵandyda 200 mıllıon teńge jymqyrǵan alaıaq áıel ustaldy
ASTANA. KAZINFORM — Qaraǵandy oblysynda ózin bank qyzmetkeri retinde tanystyrǵan 31 jastaǵy áıel 200 mıllıon teńgege jýyq qarajatty jymqyrdy degen kúdikke ilindi. Bul týraly Polisia.kz saıty jazdy.
Tergeý materıaldaryna sáıkes, kúdikti bir jarym jyl boıy ózin Ulttyq banktiń qyzmetkeri retinde tanystyryp, azamattarǵa nesıelerin merziminen buryn ótep beremin dep ýáde bergen. Osy jalǵan ýádeler arqyly ol turǵyndardyń senimine kirip, olardan atalǵan «qyzmeti» úshin tólem alyp otyrǵan.
Budan bólek, ol birneshe azamattyń atyna ekinshi deńgeıli bankterden nesıe rásimdep, aqshany óz paıdasyna jaratqan. Qazirgi ýaqytta 98 epızod boıynsha alaıaqtyq faktisi tirkelip otyr. Jalpy keltirilgen zalal kólemi 200 mıllıon teńgeden asqan.
- Qaraǵandy oblysy polıtsııa departamentiniń tergeý basqarmasy atalǵan is boıynsha tergeýdi aıaqtaýǵa jaqyn. Qazirgi tańda jınalǵan aıǵaqtar jetkilikti, qylmystyq is sotqa joldanýǵa daıyndalýda. Kúdiktige qatysty bultartpaý sharasy retinde úıqamaq qoldanylǵan, - delingen aqparatta.
Polıtsııa departamenti azamattarǵa kelesi saqtyq sharalaryn ustanýǵa keńes beredi:
-
Qarjy uıymdarynyń atynan usynylǵan qyzmetter boıynsha aqparatty tek resmı derekkózderden tekserý;
-
Ózin bank ne qarjy uıymynyń qyzmetkeri retinde tanystyratyn tulǵalarǵa saq bolý;
-
Aldyn ala tólem talap etetin kúmándi qyzmetterge senbeý;
-
Kúmándi jaǵdaı týyndaǵanda birden polıtsııaǵa júginý.
Quqyq qorǵaý organdary alaıaqtyqtyń aldyn alý úshin azamattardyń óz qaýipsizdigine jaýapkershilikpen qarap, polıtsııamen tyǵyz yntymaqta jumys isteýi qajet ekenin eske salady.
Aıta keteıik, asa iri alaıaqtyq jasaǵan qazaqstandyq azamat Grýzııada ustaldy.