Qaraǵandyda 200-den astam bolashaq dáriger jańa oqý ornyn izdeýge májbúr
QARAǴANDY. KAZINFORM - Keshe ǵana Qaraǵandy medıtsına ýnıversıteti janyndaǵy medıtsınalyq kolledj stýdentterine oqý orny lıtsenzııasyz qalǵany týraly habarlaǵan. Joǵary oqý orny buny májbúrli shara, dep túsindirip otyr, dep habarlaıdy Kazinform agenttiginiń tilshisi.
Joǵary oqý ornynan habarlanǵandaı, bes jyl buryn Qaraǵandy medıtsınalyq ýnıversıteti Ulttyq eńbek gıgıenasy jáne kásiptik aýrýlar ınstıtýtymen biriktirilgen. Bıyl sáýir aıynda Úkimettiń Qaýlysy negizinde eki mekeme bólingen. Erejege saı, qaıta uıymdastyrý rásimi barysynda JOO-nyń barlyq lıtsenzııalary qaıtaryp alynady. Qujattardy qaıta rásimdeýge kelgende, medıtsına ýnıversıteti kolledjdegi bilim berý qyzmetine lıtsenzııasyn qajet emes dep tapqan.
«2023 jyly ýnıversıtet tehnıkalyq jáne kásiptik, orta bilimnen keıingi bilim berý baǵdarlamalaryna bilim alýshylardy qabyldaýdy toqtatý týraly sheshim qabyldaǵanyn, keıinnen buryn qabyldanǵan bilim alýshylardy tolyq oqytýdy aıaqtaǵannan keıin atalǵan bilim berý baǵdarlamalaryn iske asyrýdy toqtatý týraly sheshim qabyldaǵanyn atap ótken jón. Osylaısha, JOO-da 2023-2024 jáne 2024-2025 oqý jyldarynda bilim alatyn stýdentter de, sondaı-aq tıisti kýrstarda professorlyq-oqytýshylyq quram jáne qajetti materıaldyq-tehnıkalyq jaraqtandyrý da joq. Osyǵan baılanysty, qolda bar lıtsenzııalardy qaıta resimdeý kezinde «Qaraǵandy medıtsınalyq ýnıversıteti» kommertsııalyq emes aktsıonerlik qoǵamynyń tehnıkalyq jáne kásiptik, orta bilimnen keıingi bilim berýdiń bilim berý baǵdarlamalary boıynsha biliktilik talaptaryn rastaýǵa múmkindigi joq, osyǵan baılanysty olardy iske asyrýdy toqtatady», - dep habarlady Qaraǵandy medıtsınalyq ýnıversıtetiniń baspasóz qyzmeti.
Medıtsına ýnıversıtetinde bul rette orta-arnaıy bilimi bar dárigerlerdi daıarlaýdyń tıimsizdigi de mańyzdy ról atqarǵanyn moıyndap otyr.
- Biz úshin dárigerlerdi daıarlaý jáne joǵary oqý ornynan keıingi bilim berý basym bolyp otyr. Orta arnaıy bilimi bar mamandardy daıarlaý jáne oqytý bizge birshama qıyn. Bul bizdiń negizgi qyzmetimiz emes. Kolledjde oqý JOO-daǵy oqýmen salystyrǵanda biz úshin tıimsiz, - deıdi Qaraǵandy medıtsınalyq ýnıversıtetiniń Akademııalyq máseleler jónindegi prorektory Qýatbek Tóleýbekov.
Aıta ketý kerek, kolledj 25 jylǵa jýyq qyzmet etip, orta medıtsınalyq mamandar daıarlap kelgen. Biraq sońǵy eki jylda ol jańa stýdentter qabyldaýyn toqtatqan. Qazir oqý ornynyń qabyrǵasynda 200-den astam stýdent oqıdy. Olar basqa orta oqý oryndaryna taratylady. Oqytýshylarǵa keletin bolsaq, 22 muǵalim jańa jumys oryndaryn izdeýge májbúr.
Osyǵan deıin mektepter men JOO-larda tsıfrlyq saýattylyqtyń bilim baǵdarlamasy engiziletini týraly habarlanǵan edi.
