Qaraǵandyda 19 kúndik nárestege kúrdeli júrek otasy jasaldy
ASTANA. KAZINFORM — Qaraǵandyda týa bitken júrek aqaýynyń aýyr túrine shaldyqqan 19 kúndik nárestege kúrdeli operatsııa jasaldy. Ota Oblystyq kópbeıindi kardıologııalyq ortalyq pen UMC Júrek ortalyǵy mamandarynyń birlesken jumysy nátıjesinde oryndaldy.
Nárestege ókpe tamyrlarynyń tolyq anomaldy drenajy dıagnozy qoıylǵan. Bul qannyń ókpeden júrekke qalypty aǵýyn buzatyn aýyr patologııa. Sonymen qatar balada ashyq arterııalyq ózek pen qarynshaaralyq perde aqaýy anyqtalǵan. Buǵan deıin asqazan-ishek jolynyń qatar júretin patologııasyna baılanysty oǵan operatsııa jasalǵan.
Operatsııanyń hırýrgııalyq bóligin oblystyq ortalyqtyń balalar kardıohırýrgııasy bóliminiń meńgerýshisi Ǵanıbek Aqjanov pen UMC Júrek ortalyǵy balalar kardıohırýrgııasy bóliminiń meńgerýshisi Dmıtrıı Gorbýnov oryndady. Otaǵa anestezıolog-reanımatolog, perfýzıolog jáne kardıolog qatysty.
Mundaı operatsııalar Qaraǵandy oblysynda kóp jyldan beri jasalmaǵan. Mamandardyń aıtýynsha, birlesken jumys jergilikti dárigerlerge tájirıbe jınaýǵa jáne aldaǵy ýaqytta osyndaı kómekti jańa týǵan nárestelerge óńirdiń ózinde kórsetýge múmkindik beredi.
— Bul sheberlik sabaǵynyń maqsaty — osyndaı balalarǵa operatsııany osynda, Qaraǵandyda jasaýǵa múmkindik qalyptastyrý jáne olardy respýblıkalyq ortalyqqa tasymaldaýǵa ketetin ýaqytty joǵaltpaý, — dedi Ǵanıbek Aqjanov.
Eske salaıyq, buǵan deıin Túrkistanda eki batareıka jutyp qoıǵan toǵyz aılyq sábıge ota jasalǵanyn habarlaǵan edik.
