Shomylý maýsymyndaǵy úshinshi qaıǵyly jaǵdaı: Qaraǵandyda jasóspirim sýǵa batty
QARAǴANDY. KAZINFORM — Qaraǵandyda taǵy bir qaıǵyly oqıǵa tirkeldi.
Qaraǵandy qalasyndaǵy «Kógildir toǵandar № 2» jasandy sý aıdynynda qaıǵyly jaǵdaı boldy. 17 maýsym kúni demalýǵa jáne shomylýǵa arnalmaǵan, jabdyqtalmaǵan jerde sýǵa túsý kezinde 2010 jyly týǵan jasóspirim sýǵa batyp ketken.
Qutqarý qyzmetteriniń málimetinshe, kámeletke tolmaǵan balanyń denesi jaǵalaýdan segiz metr qashyqtyqta, tórt metr tereńdikten tabylǵan. Oqıǵanyń mán-jaıy anyqtalyp jatyr.
Qaraǵandy oblystyq Tótenshe jaǵdaılar departamentinde sýdaǵy qaıǵyly oqıǵalardyń basym bóligi dál shomylýǵa arnalmaǵan oryndarda bolatynyn eske saldy.
— Ókinishke qaraı, turaqty túrde júrgiziletin eskertýlerge qaramastan, turǵyndar jabdyqtalmaǵan ári shomylýǵa tyıym salynǵan oryndarda demalýdy jalǵastyrady. Azamattardy qaýipsizdik sharalaryn saqtaýǵa, beıtanys sý aıdyndaryna túspeýge, óz múmkindikterin asyra baǵalamaýǵa jáne balalardy qaraýsyz qaldyrmaýǵa shaqyramyz. Qarapaıym qaýipsizdik erejelerin saqtaý adam ómirin saqtap, qaıǵyly jaǵdaılardyń aldyn alýǵa kómektesedi, — dep atap ótti Qaraǵandy oblystyq TJD ókilderi.
Qutqarýshylardyń aıtýynsha, sýǵa túsýge tek arnaıy jabdyqtalǵan jaǵajaılar men demalys oryndarynda ǵana ruqsat etiledi. Ondaı jerlerde adamdardyń sý jaǵasynda qaýipsiz demalýyna qajetti barlyq jaǵdaı jasalǵan.
Aıta ketý kerek, bul shomylý maýsymy bastalǵaly óńirdegi sý aıdyndarynda bolǵan úshinshi qaıǵyly oqıǵa.
Buǵan deıin Qaraǵandy oblysyndaǵy ózenderdiń birinde 15 jastaǵy qyzdyń sýǵa batyp ketkeni habarlandy.
