Qaraǵandyda 15-tegi qyzdy 38 jastaǵy erkekke turmysqa bergen

QARAǴANDY. KAZINFORM — Qaraǵandylyq polıtseıler 15 jasar qyzǵa zorlyq jasaǵan 38 jastaǵy er adamǵa qatysty qylmystyq is qozǵady.

Oqıǵa Qaraǵandy oblysynyń Abaı qalasynda boldy. Áleýmettik jelilerde 15 jastaǵy qyzdyń anasy men ógeı ákesi ony 38 jastaǵy erkekke kúıeýge bergeni týraly habar paıda boldy.

Polıtsııa kámeletke tolmaǵan balaǵa zorlyq-zombylyq jasaǵan er adamdy qamaýǵa aldy. Atalǵan fakti boıynsha qylmystyq is qozǵaldy.

— 15 jastaǵy qyzǵa qatysty qylmys jasady degen kúdikpen 38 jastaǵy er adam ustalyp, ýaqytsha ustaý ızolıatoryna qamaldy. Polıtsııaǵa aryz 15 naýryzda kelip tústi, sodan keıin dereý qylmystyq is qozǵaldy. Qazirgi ýaqytta tergeý sheńberinde oqıǵanyń barlyq mán-jaıyn anyqtaýǵa baǵyttalǵan qajetti sot-saraptamalyq jumystar júrgizilýde. Kámeletke tolmaǵan jábirlenýshimen psıhologtar jumys isteýde, — dep habarlaıdy Qaraǵandy oblysy PD baspasóz qyzmeti.

Atalǵan oqıǵaǵa QR Oqý-aǵartý mınıstrligi Balalardyń quqyqtaryn qorǵaý komıteti de túsinik berdi.

— Qazirgi tańda tergeý júrgizilýde, qylmystyq is qozǵaldy. Qajetti saraptamalar taǵaıyndaldy. Qyz bala ákesimen birge, oǵan barlyq qajetti psıhologııalyq kómek jáne zańgerlik qoldaý kórsetiledi. Bala quqyqtary jónindegi óńirlik ýákil únemi balanyń ákesimen baılanysta, sondaı-aq ógeı ákesi men anasyn qylmystyq jaýapkershilikke tartý týraly talap qoıylmaq. Balalardyń quqyqtaryn qorǵaý komıteti jaǵdaıdy nazarda ustaıdy jáne balanyń quqyqtaryn qorǵaý úshin barlyq qajetti sharalardy qabyldaıdy, — delingen Balalardyń quqyqtaryn qorǵaý komıtetiniń resmı habarlamasynda.

Qazir jábirlenýshi balanyń ógeı ákesi men anasyn jaýapkershilikke tartý máselesi sheshilýde.

Buǵan deıin SQO-da qyzyn zorlaǵan er adamdy ómir boıyna bas bostandyǵynan aıyrylǵany týraly habarlaǵan bolatynbyz.