Qaraǵandyda 13 jastaǵy bala dárigerdiń qateliginen qaıtys boldy

QARAǴANDY. KAZINFORM - Qaraǵandyda 13 jastaǵy jasóspirim qaza boldy. Bir aptaǵa jýyq balanyń ystyǵy kóterilip, belgisiz dertten zardap shekken, dep habarlaıdy Kazinform agenttiginiń tilshisi.

Áleýmettik jelilerde jasóspirimniń anasynan túsken habarlama jarııalandy.

Onyń aıtýynsha, balasy aýyrǵan bette 21-22 qańtarda ýchaskelik dárigerge júgingen. Feldsher balany qarap shyǵyp, oǵan sýyq tıip, tamaǵy qyzardy degen qorytyndyǵa kelgen.

Anasy aptanyń aıaǵyna deıin dárigerlerdiń uıǵarymy boıynsha ulyn emdep, qyzýyn túsirgen. Alaıda, balanyń aıaq-qoly isinip, jansyzdana bastaǵan. Balasynyń jaǵdaıy jaqsarmaǵanyn kórgen anasy, taǵy da ýchaskelik dárigerdi shaqyrtqan. Alaıda, dáriger taǵy da sýyq tııýdi emdeıtin dári jazyp bergen.

Bir táýlik ótken soń balanyń tynysy taryla bastaǵan. Sol kezde anasy jedel járdem shaqyrǵanyn aıtady. Biraq dárigerler 13 jastaǵy naýqasty ólimnen arashalap qala almaǵan.

Qaraǵandy oblysynyń densaýlyq saqtaý basqarmasy bul jaǵdaıǵa túsinikteme berdi.

Atalǵan oqıǵa boıynsha táýelsiz sarapshylar tobyn tarta otyryp, jan-jaqty tergeý júrgizilýde. Aldyn ala qyzmettik taldaý nátıjeleri boıynsha jekelegen medıtsına qyzmetkerleri tarapynan zańbuzýshylyq faktileri anyqtaldy. Barlyq kináli tulǵalar jaýapqa tartylady, - delingen vedomstvo habarlamasynda.

Jasóspirimniń neden qaza bolǵany ázirge belgisiz. Jańdaıdy sarapshylar anyqtaýda.

Osyǵan deıin densaýlyq saqtaý salasynda artyq ákimshilik retteý azaıatyny týraly habarlandy.