«Qaraǵandy–Astana», «Astana-Býrabaı» — jańa eki elektropoıyz baǵdary ashylady

ASTANA. KAZINFORM — Elimizde aldaǵy maýsym jáne qyrkúıek aılarynda eki jańa elektropoıyz baǵdary ashylady. Bul týraly Kólik mınıstrligi Temirjol jáne sý kóligi komıtetiniń tóraǵasy Jánibek Taıjanov aıtty. 

— Memleket basshysynyń Şýchınsk-Býrabaı kýrorttyq aımaǵyn damytý jónindegi tapsyrmasyna sáıkes, qańtar aıynan bastap Astana–Býrabaı kýrorty baǵyty boıynsha jańa vagondardan quralǵan jedel elektr poıyzy iske qosyldy. Onyń jol júrý ýaqyty — 2,5 saǵat. Osyndaı jańa elektr poıyzy osy jyldyń jazynda, maýsym aıynda Qaraǵandy–Astana baǵyty boıynsha iske qosylady. Qosymsha úshinshi elektropoıyz «Astana-Býrabaı kýrorty» baǵytynda jolǵa shyǵady, — dedi ol OKQ alańynda.

Sondaı-aq komıtet basshysy 2024 jyldyń 4-toqsanynan bastap Qaraǵandy men Pavlodardan Býrabaı kýrortyna deıingi elektr poıyzdarynyń baǵyttary uzartylǵanyn atap ótti.

Aıta keteıik, búgin Sıan–Almaty baǵytynda jolaýshylar poıyzy jolǵa shyqqanyn jazǵan edik.