Qaraǵandy joldaryna qar men kóktaıǵaqqa qarsy qorǵan ornatyldy
QARAǴANDY. KAZINFORM — Qaraǵandy oblysynda aýa raıy áli jyly bolǵanymen, jol qyzmetteri aldaǵy qysqy maýsymǵa tyńǵylyqty ázirlenip jatyr. Aldaǵy aptada respýblıkalyq mańyzy bar trassalarda qysqy kezekshilik bastalyp, arnaıy tehnıka men materıaldar daıyn kúıge keltirildi.
Qar men boranǵa qarsy júıeli daıyndyq
«QazAvtoJol» AQ Qaraǵandy oblystyq fılıalynyń habarlaýynsha, 2025–2026 jyldardaǵy qysqy maýsymǵa daıyndyq belgilengen kestege sáıkes júrgizilip keledi. Barlyq baǵytta jóndeý jáne aldyn alý jumystary aıaqtalyp, qoımalar men tehnıkalyq bazalar tolyq jabdyqtalǵan.
— Negizgi maqsatymyz qar men boran kezinde kólik qozǵalysynyń qaýipsizdigin jáne úzdiksiz ótýin qamtamasyz etý. Árbir ýchaske táýlik boıy baqylaýda bolady, — deıdi fılıal ókilderi.
Mamandardyń aıtýynsha, daıyndyq sharalary mamyr aıynan bastalǵan. Osy ýaqyt ishinde jol jıegin tegisteý, shuńqyrlardy jamaý, butalardy kesý jáne shóp shabý jumystary júrgizilgen. Bul sharalar boran kezinde joldyń qar basyp qalýyna jol bermeıdi. Sonymen qatar, qorshaýlar jóndelip, sý ótkizý qubyrlary men shaǵyn kópirler tekserildi.
Tehnıka men materıaldar tolyq daıyn
Qazir 158 arnaıy tehnıkanyń 152-si, ıaǵnı 96 paıyzy sapta tur. Olardyń qatarynda 88 biriktirilgen qar tazalaý kóligi, 14 avtogreıder, 30 traktor jáne 12 tıegish bar. Sonymen birge, kúrdeli ýchaskeler úshin býldozerler men qar tazalaıtyn shnekorotorlar ázirlengen.
Qoımalarda 16,7 myń tekshe metr untaq tas (jospardaǵy 22 myńnan), 2,2 myń tonna tuz (3,2 myńnan) jáne 465 tonna kómir jınalǵan. Barlyq jetkizý kelisimsharty jasalyp, materıaldar josparly túrde jetkizilip otyr.
— Qar jaýyp, kóktaıǵaq bolsa tolyq daıynbyz. Qatty boran nemese aıaz kezinde táýlik boıǵy kezekshilik pen tehnıka jedel túrde jolǵa shyǵarylady, — dedi «QazAvtoJol» Qaraǵandy fılıalynyń mamandary.
1885 shaqyrym jol táýlik boıy baqylaýda
Qys mezgilinde oblys boıynsha respýblıkalyq mańyzy bar 1885 shaqyrym jol qardan tazartylady. Erekshe nazar Astana–Qaraǵandy, Qaraǵandy–Balqash jáne Qaraǵandy–Qarqaraly baǵyttaryna, sondaı-aq bederi kúrdeli, qar jıi úıiletin ýchaskelerge aýdarylady.
Bul ýchaskelerde uzyndyǵy 143,7 myń metr turaqty qar toqtatqysh qorshaýlar ornatylǵan. Qosymsha 11,5 myń metr ýaqytsha aǵash qalqandar qoıylady. Al Qaraǵandy–Balqash trassasynyń jańartylǵan bóliginde 95 myń metr betondy qar ustaý júıesi iske qosylyp, boran kezinde joldyń ótkizý qabileti artqan.
Tsıfrly baqylaý men jańa tehnıka
Joldardy tazalaý tıimdiligin arttyrý úshin qum men tuzdyń ońtaıly qospasy paıdalanylady. Aqyly ýchaskelerde ornatylǵan beınebaqylaý júıeleri joldaǵy jaǵdaıdy naqty ýaqyt rejıminde baqylap, tehnıkany qajet baǵytqa jedel jiberedi.
Barlyq jumys jedel shtabtyń qadaǵalaýynda. Dabyldy eskertý túsken jaǵdaıda jol qyzmetteri Tótenshe jaǵdaılar departamenti, polıtsııa jáne «Qazgıdrometpen» birlesip áreket etedi. Al qozǵalys shekteý nemese jol jabylýy týraly aqparat «QazAvtoJoldyń» resmı arnalary men Telegram-kanaldarynda jáne jol boıyndaǵy aqparattyq tablolarda jarııalanady.
Júrgizýshiler táýlik boıy 1403 baılanys ortalyǵyna habarlasa alady.
Jańa bólimsheler men avtopark jańǵyrýy
Búginde oblys aýmaǵynda segiz jol paıdalaný ýchaskesi jumys isteıdi. Jaqyn arada taǵy úsh bólimshe — Jumabek, Aqshataý jáne Saryshaǵan eldi mekenderinde ashylady. Bul boran kezinde jol qyzmetiniń áreket etý jyldamdyǵyn arttyryp, jol kútiminiń sapasyn jaqsartady.
Bıyl avtopark 40 jol tazalaý tehnıkasy, 7 Lovol traktory, 9 «Gazel» jáne 7 pıkappen tolyqty. Bul jańartý ásirese shalǵaıdaǵy ýchaskelerdiń jumys tıimdiligin arttyrǵan.
— Biz tehnıkany jańartyp, jol kútimine zamanaýı ádister engizýdi jalǵastyryp kelemiz. Qys qanshalyqty qatal bolsa da, basty maqsatymyz — ár trassanyń qaýipsiz jáne ashyq bolýyn qamtamasyz etý, — deıdi fılıal ókilderi.
Mamandardyń aıtýynsha, Qaraǵandy óńirinde boran, kóktaıǵaq pen qatty jel jıi bolyp turatyn tabıǵı qubylys. Sondyqtan mundaı ýchaskelerde qar toqtatý jáne joldardy baqylaý sharalary kúsheıtilgen. Eń bastysy — júrgizýshilerdiń qaýipsizdigi men jol qozǵalysynyń úzdiksizdigin saqtaý.
Eske salsaq, Soltústik Qazaqstan oblysynda óńirlik mańyzy bar joldardy qysta kútip ustaýǵa bıyl 1,5 mlrd teńgege jýyq qarjy bólingeni jaıly habarlaǵan bolatynbyz.