Qaraǵandy joldaryn 80 patrýl men 160 polıtseı táýlik boıy baqylaýda ustaıdy

QARAǴANDY. KAZINFORM — Qaraǵandy oblysyndaǵy avtojoldarda aýa raıynyń kúrt nasharlaýyna baılanysty qozǵalys ýaqytsha shekteldi. Polıtsııa qyzmetkerleri táýlik boıy jol jaǵdaıyn baqylap, kólikterdi qaýipsiz ótkizý sharalaryn júrgizip jatyr.

Jańbyr men kúshti jel saldarynan oblysta respýblıkalyq jáne oblystyq mańyzy bar avtojoldarda barlyq baǵytta qozǵalys ýaqytsha shekteldi.

Jol qozǵalysynyń qaýipsizdigin qamtamasyz etý úshin patrýldik polıtsııa batalony kúsheıtilgen qyzmet rejımine aýystyryldy. Qazirgi tańda 80 ekıpaj ben 160 polıtsııa qyzmetkeri táýlik boıy jol jaǵdaıyn qadaǵalap, kólikterdi qaýipsiz ótkizýge jaýapty.

Búgin tańerteńnen bastap polıtsııanyń ilesip júrýimen: Qaraǵandy — Temirtaý baǵyty boıynsha 500 avtokólik, Temirtaý — Qaraǵandy baǵyty boıynsha 300 avtokólik, Aqmola oblysynyń shekarasyna deıin 1 200 avtokólik qaýipsiz ótkizildi. 

— Bizdiń basty mindetimiz — azamattardyń ómiri men densaýlyǵyn saqtaý. Osy maqsatta óńir avtojoldarynda barlyq qajetti qaýipsizdik sharalary qabyldandy, — dedi Qaraǵandy oblysy Polıtsııa departamenti patrýldik polıtsııa batalonynyń komandıri Medet Nurmuhanov.

Polıtsııa turǵyndar men qonaqtardy ýaqytsha shekteýlerge túsinistikpen qarap, jol qozǵalysynyń zań talaptaryn oryndaýǵa shaqyrady.

Qolaısyz aýa raıynda júrgizýshilerge uzaq sapardan bas tartý, jol belgilerin qatań saqtaý, jyldamdyq rejımin jáne qaýipsiz araqashyqtyqty saqtaý usynylady.

Tótenshe jaǵdaılarda dereý polıtsııa qyzmetkerlerine júginý qajet.

Budan buryn Pavlodar jáne Qaraǵandy óńirlerinde jol qozǵalysy shektelgenin jazǵanbyz.