«Qaraǵandy – Jezqazǵan» tasjoly 2029 jylǵa deıin tolyq jańartylady

29 maýsymda respýblıkalyq mańyzy bar «Qaraǵandy — Jezqazǵan» avtomobıl jolyn qaıta jańartý jumystary bastaý aldy. Jalpy uzyndyǵy 572 shaqyrymdy quraıtyn kúre joldyń 457 shaqyrymyn qamtıtyn bul joba — Ortalyq Qazaqstandaǵy kólik ınfraqurylymyn jańǵyrtýǵa baǵyttalǵan iri bastamalardyń biri.

Іs-sharaǵa Premer-mınıstrdiń birinshi orynbasary Nurlybek Nálibaev, «QazAvtoJol» ulttyq kompanııasy» AQ basqarma tóraǵasy Darhan Imanashev, Qaraǵandy oblysynyń ákimi Ermaǵanbet Bólekpaev, Ulytaý oblysynyń ákimi Dastan Ryspekov, merdiger uıymdar men jol salasynyń ókilderi qatysty.

«Qaraǵandy — Jezqazǵan» avtomobıl joly «Qyzylorda — Pavlodar — Ýspenka» avtokólik dáliziniń quramyna kiredi. Jobany iske asyrý óńirler arasyndaǵy kólik baılanysyn kúsheıtip, eldiń tranzıttik áleýetin arttyrýǵa jáne Qaraǵandy men Ulytaý oblystarynyń ekonomıkalyq damýyna jańa múmkindik berýge baǵyttalǵan.

Qoldanystaǵy «Qaraǵandy — Jezqazǵan» joly 1970 jyldary III tehnıkalyq sanat parametrleri boıynsha salynǵan. Ol bir oske túsetin 6 tonnaǵa deıingi júktemege eseptelgen. Paıdalanýǵa berilgennen beri bul baǵytta kúrdeli jóndeý júrgizilmegen. Sonymen qatar sońǵy jyldary kólik qozǵalysynyń qarqyndylyǵy, onyń ishinde aýyr júk jáne uzyn ólshemdi kólik úlesi aıtarlyqtaı artty.

Qaıta jańartý aıasynda jol II tehnıkalyq sanat talaptaryna sáıkestendiriledi. Joba jol tósemin jańartýdy, jasandy qurylystardy salý men qaıta jańartýdy, demalys alańdaryn, aıaldama pýnktterin, jolǵa qosylý jáne qıylysý oryndaryn jaılastyrýdy kózdeıdi.

Bul jobanyń mańyzy jalpy uzyndyǵy 400 shaqyrym bolatyn «Qyzylorda — Jezqazǵan» avtojolyn qaıta jańartý jobasymen birge arta túsedi. 2025 jyly Qyzylorda oblysy aýmaǵyndaǵy 192 shaqyrymda negizgi jumystar aıaqtalyp, kólik qozǵalysy ashyldy. 2026 jyldyń sońyna deıin Ulytaý oblysyndaǵy ýchaskede negizgi jumystardy aıaqtap, qozǵalysty iske qosý josparlanyp otyr.

Osylaısha, Qazaqstanda Astana — Qaraǵandy — Jezqazǵan — Qyzylorda baǵyty boıynsha tikeleı avtomobıl marshrýty qalyptasady. Bul óńirler arasyndaǵy araqashyqtyqty qysqartýmen ǵana shektelmeı, eldiń ortalyǵy men ońtústigin baılanystyratyn jańa kólik aǵynyn qurýǵa múmkindik beredi. Baǵyt ishki logıstıkany kúsheıtip, júk pen jolaýshylar qozǵalysyn jedeldetedi, sondaı-aq Qazaqstannyń Eýrazııadaǵy tranzıttik torap retindegi rólin arttyrady.

— Búgin biz Qaraǵandy jáne Ulytaý oblystary úshin ǵana emes, elimizdiń búkil kólik júıesi úshin mańyzdy jobany bastaımyz. Qaraǵandy — Jezqazǵan jáne Qyzylorda — Jezqazǵan baǵyttary birige otyryp, Astanadan Qyzylordaǵa deıingi tikeleı marshrýtty qalyptastyrady. Bul — el ishindegi qozǵalystyń jańa logıkasy: jyldam, qaýipsiz ári tıimdi. «QazAvtoJol» úshin jeke bir ýchaskeni ǵana jańartý emes, ekonomıkaǵa, óńirlerge, bızneske jáne halyqqa qyzmet etetin zamanaýı dáliz qurý mańyzdy. Bul jol ondaǵan jyl boıy kúrdeli jańartýdy kórmedi. Endi biz ony jańa deńgeıge kóteremiz, — dedi «QazAvtoJol» ulttyq kompanııasy» AQ Basqarma tóraǵasy Darhan Imanashev.

Joba tolyq iske asqannan keıin ýchaskeniń ótkizý qabileti 33 paıyzǵa artady, al jol júrý ýaqyty 2,4 saǵatqa qysqarady. Jumystar kezeń-kezeńimen atqarylady. Qaıta jańartýdy 2029 jylǵa deıin aıaqtaý josparlanǵan.

Qurylys jumystaryna 2 500-den astam maman jáne 1 000-nan asa jol tehnıkasy jumyldyrylady. Joba sheńberinde shamamen 30 mln tekshe metr jer jumystary oryndalyp, 5 mln tekshe metrden astam ınertti materıal, 88 myń tonna bıtým jáne 85 myń tekshe metr temirbeton buıymdary paıdalanylady.

Sonymen qatar 52 kópir, 72 jol ótpesi, 28 kólik aıryǵy, 447 sý ótkizý qubyry, 8 demalys alańy, 15 qoǵamdyq kólik aıaldamasy, sondaı-aq 267 qıylysý jáne qosylý nysany qarastyrylǵan.

«Qaraǵandy — Jezqazǵan» avtomobıl jolyn qaıta jańartý «QazAvtoJol» ulttyq kompanııasynyń respýblıkalyq jol jelisin jańǵyrtý, qozǵalys qaýipsizdigin arttyrý jáne Qazaqstannyń turaqty kólik dálizderin damytý baǵytyndaǵy keshendi jumysy aıasynda iske asyrylýda.

Aıta ketelik 136 myń jol belgisi tekserildi: Qazaqstanda 97% talapqa saı ekeni anyqtaldy.