Qaraǵandy - Jezqazǵan, Saryaǵash avtojoldarynyń qurylysyna qarajat kózi tabyldy

Kelesi jyly jol qurylysyndaǵy negizgi iri jobalar aıaqtalyp, jańa jobalar qolǵa alynady. Bul týraly Kólik mınıstri Marat Qarabaev aıtty, dep habarlaıdy Kazinform.

Vedomstvo basshysynyń málimetinshe, Prezıdent tapsyrmasyna sáıkes, 2029 jylǵa deıin 8 myń shaqyrym jolda rekonstrýktsııa jumystaryn júrgizý qajet.

«Kelesi jyly negizgi iri jobalar aıaqtalyp, qurylys kompanııalarynyń tehnıkalary men jumys kúshi bosaıdy. Sondyqtan, 2024 jyldan bastap, jalpy 4 700 shaqyrym bolatyn basym jobalar qurylysyn kezeń-kezeńimen bastaımyz. Bul máseleni sheshý úshin syrtqy jáne ishki kózderden qarjy tartý jumystary júrgizilýde», – dedi Marat Qarabaev Úkimettiń búgingi otyrysynda.

Qazirgi tańda «Saryaǵash qalasynyń aınalma joly» men «Qaraǵandy - Jezqazǵan» jobalary boıynsha Azııa jáne Dúnıejúzilik damý bankterinen qarajat tartý kózi aıqyndalǵan. Qalǵan jobalardy iske asyrý úshin daıyndyq jumystary bastalyp, qarjylandyrý tetikteri anyqtalyp jatyr.

«Іri jobalardyń bastalýy jol-qurylys materıaldary óndirisin ulǵaıtýdy, qurylys tehnıkalary men qosymsha ınjenerlik qyzmetkerlerdi qajet etedi. Sondyqtan, jol bıtýmynyń tapshylyǵyn boldyrmaý úshin tsementbeton joldarǵa kóshý jáne bıtýmdy ımporttaý boıynsha sharalar qabyldanýda. Inertti materıaldardyń jańa karerleri zerttelip, temirbeton buıymdarynyń óndirisin arttyrý kózdelip otyr. Kelisimsharttarda merdigerlerdiń jeke jol-qurylys tehnıkasy parkiniń bolýy boıynsha naqty talaptar qoıyldy», – deıdi Marat Qarabaev.

Aıta keteıik, halyqtyń shaǵymdaryn eskere otyryp, osy jyly barlyq kúsh qurylysy uzaqqa sozylǵan 6 negizgi jobaǵa baǵyttalǵan. Bul Taldyqorǵan - Óskemen, Qaraǵandy - Almaty, Merke - Býrylbaıtal, Aqtóbe - Qandyaǵash jáne Atyraý - Astrahan joldary.

Sondaı-aq bıylǵy 11 aıdyń qorytyndysy boıynsha respýblıkadaǵy aqyly joldardan 26 mlrd 500 mln teńge qarajat tústi. Sońǵy ýaqytta tranzıttik aǵynnyń artýyna baılanysty, jóndelgen joldardy normatıvtik jaǵdaıda saqtaý úshin jol aqysy qaıta qaralyp jatyr.