Qaraǵandy-Jezqazǵan avtojoly qaıta jańartylmaq
ASTANA. KAZINFORM — Elimizdiń kólik ınfraqurylymyn jáne óńirlerdiń arasyndaǵy baılanysty damytý maqsatynda respýblıkalyq mańyzy bar Qaraǵandy-Jezqazǵan avtomobıl jolyn qaıta jańartý boıynsha jol-qurylys jumystary josparlanyp otyr. Bul týraly QazAvtoJol málimdedi.
Atalmysh jol ýchaskesiniń jalpy uzyndyǵy 572 shaqyrym, ony ІІ tehnıkalyq sanatta eki jolaqty etip, jol jabynyn jaqsartyp, zamanaýı qaýipsizdik talaptaryna saı etip salý qarastyrylyp otyr.
— Qazirgi tańda qarjylandyrý kózin anyqtaý boıynsha jumystar atqarylyp jatyr. Joba keshendi túrde júzege asady: jobalaý, qurylys jáne qoldanysqa berý. Qarajat kózi bekitilgennen keıin daıyndyq jumystary 2025 jyldyń ІІІ-ІV toqsanyna josparlanǵan. Bul joba Ortalyq Qazaqstanǵa ǵana emes, elimizdiń jol salasy úshin úlken mańyzǵa ıe bolmaq. Ol aımaqtar arasyndaǵy kólik qatynasyn nyǵaıtyp, óńirlerdiń áleýmettik-ekonomıkalyq damýyna septigin tıgizbek. Sondaı-aq, respýblıkanyń ońtústik óńirlerimen kólik dálizin damytý aıasynda uzyndyǵy 426 shaqyrymdy quraıtyn Qyzylorda-Jezqazǵan avtojolyn qaıta jańartý jumystary júzege asyrylyp jatyr, — delingen habarlamada.
Bul jol Qyzylorda jáne Ulytaý oblystaryn qosady. Qyzylorda oblysy boıynsha 150 shaqyrymnan astam jolda jumystar atqaryldy, al Ulytaý oblysy jol-qurylys jumystary qarqyndy júrgizilýde. Qaraǵandy men Jezqazǵan arqyly salynatyn jol Astanadan Qyzylordaǵa deıin elimizdiń tranzıttik áleýetin arttyryp, óńirlerdiń damýyna jáne Qazaqstannyń jol salasyn jańǵyrtýǵa úlken serpin bermek.
Buǵan deıin habarlanǵandaı, QazAvtoJoldyń 1403 baılanys ortalyǵy 17 myńnan astam ótinimdi óńdedi.