Qaraǵandy JES-1 jylý tarıfin kóterýdi usyndy: sheshim 1 aıda qabyldanady

ASTANA. KAZINFORM — Astanada Qaraǵandy JES-1 operatory «Nova Novatis LTD» jeke kompanııasynyń tarıfine qatysty qoǵamdyq tyńdaý ótkizdi.

Tyńdaýdy Astana qalasy boıynsha Tabıǵı monopolııalardy retteý komıtetiniń departamenti uıymdastyrdy.

Kompanııa dırektory Sergeı Krıvovtyń aıtýynsha, jylý energııasyn óndirý tarıfin bir jyl merzimge bekitý usynylǵan. Eger maquldansa, ol 2025 jylǵy 1 qazannan bastap kúshine enedi.

Qoldanystaǵy tarıf 1 Gkal úshin 8201,31 teńge turady, al jańa tarıfke sáıkes, 1 Gkal úshin 11 585,36 teńge usynylyp otyr.

Kompanııa ókilderiniń málimdeýinshe, tarıf mólsheri barlyq josparlanǵan shyǵyndy jabýǵa jáne jylytý maýsymynda JES-1-diń turaqty jumysyn qamtamasyz etýge múmkindik beredi.

Qaraǵandy JES-1 Temirtaýda ornalasqan jáne qalanyń batys bóligin jylýmen qamtamasyz etedi. Kásiporynnyń balansynda jylý jelileri joq. Elektr stantsııasy aralas rejımde jumys istep, ári elektr, ári jylý energııasyn óndiredi.

Jylý óndirý boıynsha josparlanǵan qyzmet kólemi jylyna 80 330 Gkaldy quraıdy. Negizgi tutynýshylar:

— «Oqjetpes-T» JShS — jalpy kólemniń 86,4%-y;
— «TEMK» AQ — 12,1%;
— «TLZ» JShS — 1,2%;
— SDıÝShOR KMM — 0,3%.

Aıta keteıik, «Astana-Teplotranzıt» AQ 2025 jylǵy qyrkúıekten bastap jylý tarıfiniń kóterilýi týraly aqparatty joqqa shyǵarǵan bolatyn.